قلدّني بـ جبر خاطر الناس.. أحمد العوضي يرد على منتقدي تصويره مع عامل النظافة: مش ناقص شهرة
رد الفنان أحمد العوضي على بعض رواد مواقع التواصل الاجتماعي، الذين اتهموه باستغلال تريند عامل النظافة - صاحب واقعة كشري التحرير، بعد ظهوره معه بالأمس، وتوفير وظيفة لـ العامل جبرًا لخاطره، عقب طرده من محل كشري، إذ أكد الفنان أنه فعل ذلك جبرًا لخاطر العامل، دون النظر في أي شيء آخر.
وشارك العوضي جمهوره بفيديو، يرد في على منتقدي ظهوره مع عامل النظافة، في موقع فيسبوك، قائلا: الناس اللي بتقول ده شو وصورت الراجل والكلام دا.. لو أخوك عنده مشكلة في الشارع بتجيب حقه قدام الناس.. في المكان اللي اتعمل عليه نمرة فيه.. اللي بينك وبين ربنا الصدقة.. أنا مورتكش اديته كام ولا عملت له إيه.. أنا جبرت بخاطره، لأن مَن صار بين الناس جابرًا للخواطر أدركه الله في جوف المخاطر.
وتابع العوضي: الراجل اتكسر قدام الناس، فحقي اطلعه منصور قدام الناس برضوا.. ده من حقي ودوري لو ربنا مديني شُهرة أني استخدمها.. ربنا إداني الشهرة لسبب وبستخدمها في السبب اللي يرضي ربنا.. ودي حاجة بيني وبين ربنا.. اوعى تفتش في النوايا.. أنت مش قاضي في الأرض.
وأضاف العوضي: كل الموضوع أني نزلت بوست لا صورته ولا حاجة، لأن أنا راجل ابن شارع.. أنا قاعد في الشارع طول عمري، وهفضل في الشارع وهفضل أراضي في خلق الله.. دي حاجة بيني وبين ربنا.
واستكمل العوضي: لما قابلت الراجل.. قُلت له هناكل أنا وأنت في طبق واحد، لأن كلنا واحد وولاد تسعة.. أنا مبسطها.. الدنيا مش كلها اللي أنت شوفته.. أنت أخويا وكلنا ولاد آدم، واللي عملته مش مقصود بيه شو ولا أي حاجة.. اللي أسعد الراجل أنه حس أنه منصور ولقى شغل.
كما وجه العوضي رسالة لمنتقديه، قائلًا: ياعم قلدني.. دي حاجة كبيرة أنك تفتح له باب رزق، وأنا ربنا جعلني سبب لوظيفته الجديدة، أنا مش ناقص شهرة، بس بصدر لك حاجة كويسة.. لو عايز تقلدني قلدني أنك تجبر خاطر الناس، وربنا يقدرنا على فعل الخير.
