بهاء سلطان: في بدايتي كنت بغني كورال.. ومصطفى كامل وقف جنبي وعملي أهم أغنياتي
تحدث الفنان بهاء سلطان، عن بداية مشواره الفني، مشيرًا إلى أنه بدأ بالغناء داخل كورال للفنان حسام حسني، كما أكد أن الفنان مصطفى كامل، آمن به وكان يحرص على مساعدته في بداياته.
وقال بهاء سلطان، خلال حواره مع الفنانة أنغام عبر شاشة قناة DMC: في بدايتي غنيت كورال ورا حسام حسني، ووقتها كان ليها قصة بسيطة إن الأستاذ حسام حسني، كان اخته زميلاتنا في الكلية، وفي مرة قالت لي مش عايز تغني؟ لأن حسام حسني وقتها كان بيعمل فريق كورال وحسام سمعني، واختارني وبدأنا نسجل حاجات كورال في الكلية.
وكشف بهاء سلطان، كواليس تعرفه على الفنان مصطفى كامل، قائلًا: جت فترة كنا بنسجل بنعمل شريط لأستاذ مصطفى كامل، بس كان الكورال هو اللي بيغني الأغاني دي، وحسام حسني، قال له أسمع بهاء صوته حلو وهيعجبك، وغنيت له حاجات شعبي وهو بيحب اللون ده وعجبه الموضوع، وقالي أنت صوتك يعمل شريط لوحده، وبعدين خدنا ميعاد من الأستاذ نصر محروس وروحنا وبدأت بقى.
وتابع: أستاذ مصطفى كامل، وقف جنبي كتير حتى أول ألبوم ليا وأغنية احلف هو اللي عاملها، وتاني شريط بردو عملي أغنية 3 دقائق، وفضلنا كده فترة لغاية ما هو قلل شغل بشكل عام مع الشركات، وهو وقف جنبي وعملي أهم أغاني غنتها ووصلت للناس.
وأضاف: مصطفى كامل، حطني في دماغه وكان مهتم إني أكمل، وكان فيه 8 أغاني على بعضهم كانوا شريط ووصلوا للناس، وهو كان مصدقني أوي، ولغاية دلوقتي بيقولي خلي بالك من نفسي.
بهاء سلطان
وكشف بهاء سلطان، عن كواليس أغنيته الشهير يا ترى، قائلًا: أغنية يا ترى، سجلتها 4 مرات، كنت كل مرة بخلص عليهم ويزهقوا وأمشي وأقول المرة اللي جايه، والدخول بتاع الأغنية قعدت فترة عشان أتقنها وروح الفنان كانت محتاجة وقت عشان تحضر، وواحدة واحدة مشيت، وأستاذ طارق عاكف كان بالنسبة ليا حلم.
واستكمل: واحد صاحبي قالي أغنية يا ترى بقالي 10 سنين مسمعتش زيها وممكن تعيش، ولو أنت راكب عجلة ولا طيارة إحنا بنحبك، وأصحابي كلنا تقريبًا عندنا نفس الذوق في السمع.
