هشام إسماعيل: مقابلتش في حياتي محامي سمسار زي دوري في إيجار قديم.. وبستفيد من خبرات أبطاله
أعرب الفنان هشام إسماعيل عن سعادته بالمشاركة في مسلسل إيجار قديم، مع الفنان شريف منير وصلاح عبد الله وميمي جمال، مشيرًا إلى أنه يكتسب خبرات منهم.
وقال هشام إسماعيل لـ القاهرة 24: مشفتش في حياتي محامي سمسار زي شخصيتي في المسلسل، وده شيء جديد عليا، ولكني اتعاملت مع محامين كزبون وموكل ليهم، والحمد لله قدرت من خلال خبرتي البسيطة من الأصدقاء والمحامين أفهم الدنيا ماشية إزاي، ومن كتابة المؤلف عمرو الدالي الدقيقة، استفدت من كتابته أوي.
وأضاف هشام إسماعيل: المنتج كريم أبو ذكري بيقول أنا ربنا وفقني في الكاست كله تحس إنهم كلهم قرايب، والمسلسل الناس اللي شغاله فيه حابين بعض، أستاذ صلاح عبد الله بحبه وبيدعمني من يوم ما طلعت وبيساندني في حاجات كتير، وبستفيد من شريف منير ومن موهبته واشتغلت معاه في مسلسل إجازة مفتوحة واستمتعت بالشغل معاه.
وتابع هشام: واشتغلت مع الفنانة ميمي جمال في حكاية مش مبسوطة من حكايات مسلسل زي القمر، وأنا بحب كل الأساتذة اللي عاصروا الفن وهو بيتعمل بمزاج، وهي بتسكب عليّا خبراتها طول الوقت وبيني وبينها كيمياء، وباقي الكاست سعيد بالعمل معاهم، وباخد خبرات منهم وإزاي قدروا يحافظوا على نجوميتهم السنين دي كلها.
أبطال مسلسل إيجار قديم
يشارك في مسلسل إيجار قديم، كل من: الفنان شريف منير، ميمي جمال، صلاح عبد الله، هشام إسماعيل، فيدرا، محمد الشرنوبي، رحمة حسن، حازم سمير، محمد نشأت، بسمة داوود، إلهام وجدي، والمسلسل من تأليف عمرو الدالي، وتحت قيادة المخرج طارق رفعت.
