إلهام شاهين عن تكريم كاملة أبو ذكري في مهرجان القاهرة السينمائي: قدمت معها أحلى أعمالي
أعربت الفنانة إلهام شاهين، عن سعادتها الكبيرة بـ تكريم المخرجة كاملة أبو ذكري، بجائزة فاتن حمامة للتميز، وذلك خلال حفل افتتاح مهرجان القاهرة السينمائي الدولي بدورته الـ 44.
وقالت إلهام شاهين، عن كاملة أبو ذكري، خلال حوارها مع قناة DMC، على هامش فعاليات حفل افتتاح مهرجان القاهرة السينمائي: تكريم حبيبة قلبي كاملة أبو ذكري، اللي قدمت معاها أحلى أعمالي على الإطلاق وآخر عمل في حياتي، مسلسل بطلوع الروح اللي كل يوم بياخد جائزة في بلد، وكاملة مخرجة مهمة جدًا ومميزة جدًا وأعمالها علامة في تاريخنا سواء سينمائيًا أو دراميًا.
وتابعت كاشفة كواليس عملها مع المخرج كاملة أبو ذكري، في فيلم واحد صفر: كاملة أبو ذكري، الوحيدة اللي كل مرة بتفاجئني، يعني بتفكر فيا في أدوار مفيش حد فكر فيا فيها من قبل ولا أنا قدمتها، يعني في فيلم واحد صفر قدمت المرأة المسيحية وقضية شائكة جدًا وجالي جوابات شكر كتير من ستات مسيحيات شافوا إني بأدي دورهم في الحياة.
كما علقت على تكريم الفنانة لبلبة، بجائزة الهرم الذهبي لـ إنجاز العمر، بمهرجان القاهرة السينمائي، قائلة: لبلبة حبيبة قلبي وصداقة عمر وعشرة عمر طويلة وبموت فيها، إنسانة طيبة جميلة وصادقة وبتحب شغلها أوي وتستاهل كل تكريم.
وأشادت الفنانة إلهام شاهين، بجهود الفنان حسين فهمي، رئيس مهرجان القاهرة السينمائي، موضحة: اللي بيميز الدورة دي وجود الفنان العظيم حسين فهمي، وطبعًا وجوده عامل ثقل كبير للمهرجان كاسم نجم كبير، وعندنا السنة دي ضيوف أجانب كتير جدًا وكمان المخرج بيلا تار هيكون فيه ندوة ليه بكرا وماستر كلاس، وهيعرضوا فيلم ليه، وفي والسنة دي فيه ضيوف كتير مهمين وأفلام مهمة، يعني هنبقى محتارين نشوف إيه ولا إيه.
وأضافت: والفنان حسين فهمي وكل فريق العمل عاملين مجهود كبير جدًا علشان المهرجان يظهر على أعلى مستوى، المهرجان حلو جدًا كله إيجابيات ومفيش سلبيات، المهم إن الناس تتابع الأفلام وتستمتع بأفلام مميزة مش هيقدروا يشوفوها غير في المهرجانات.
