هند عاكف عن فستانها في القاهرة السينمائي: مصطفى فهمي قالي فين صورتي قولتله حسين موجود
تحدثت الفنانة هند عاكف، عن تفاصيل إطلالتها في افتتاح مهرجان القاهرة السينمائي، الذي أقيم أمس الأحد في تمام الساعة السابعة مسًاء، معربة عن سعادتها بهذا المهرجان، وحرصها الدائم على حضوره.
فستان هند عاكف
وقالت هند عاكف، في تصريحات خاصة لـ القاهرة 24: حاولت أعمل حاجة لطيفة وإطلالة مختلفة للنجوم الكبار.. أنا فكرت في الموضوع ده من حوالي 6 شهور، وابتدينا ننفذ الفستان مع فريق العمل، لأنه بيفهم دايمًا وجهة نظري.
وعن صاحبة فكرة الفستان، قالت هند عاكف: أنا صاحبة الفكرة وبعرض على فريق العمل ونظبط الدنيا، وعملت تسريحة الستينات علشان تتناسب مع الدريس والدنيا كانت لطيفة، وأنا عارفة إننا تريند بالفستان.
هند عاكف: مصطفى فهمي قالي فين صورتي
وعن تصدرها التريند عبر محركات البحث بمواقع التواصل الاجتماعي، قالت هند عاكف: إيه المشكلة لما أعمل تريند بقيمة فنية مش أحسن من إللي بيعمل تريند مسئ للنظر والناس، وكنت متوقعة إني هطلع تريند لأنه طبيعي أنا عاملة حاجة مختلفة.
واستكملت هند عاكف: الفستان الحمد الله عجب كل الحضور، ومصطفى فهمي قالي حلو الفستان ده فين صورتي قلت له صورة الأستاذ حسين فهمي موجودة، كان نفسي أحط صوركوا كلكم.
كما وجهت هند عاكف رسالة، للفنان حسين فهمي مدير مهرجان القاهرة السينمائي، قائلة: أنا سعيدة جدًا بالمهرجان وبنزل المهرجان من الدورة الـ18، ومينفعش نسئ ليه.
وتابعت هند عاكف: بشكر حسين فهمي، على المجهود الرائع إللي كان معمول في دورة الافتتاح وهنلاحظ ده في الندوات واللقاءات والأفلام، وحريصة جدًا على حضور متابعة الفعاليات، وهحاول على قد ما قدر أتابع كل الفعاليات.
