إبراهيم حسن يفتح النار على اتحاد الكرة: شغالين بالمزاج.. والتعاقد مع فيتوريا مخاطرة
فتح إبراهيم حسن نجم منتخب مصر السابق النار على اتحاد الكرة المصري، بعد إخفاق منتخب مصر للناشئين أمام المغرب.
تصريحات إبراهيم حسن
وقال إبراهيم حسن في تصريحات تليفزيونية: مستوى منتخب مصر للناشئين أمام المغرب عيب، مش عارفين نتفوق في المنتخب الأول على الأقل نتفوق في الفئات السنية الأخرى.
وأضاف إبراهيم حسن: أحمّل اتحاد الكرة المسؤولية الخاصة بإخفاق منتخب مصر للناشئين، وكل واحد في اتحاد الكورة شغال بدماغه ومفيش نظام ثابت، فجأة يجيب مدرب أجنبي، وفجأة يجيب مدرب تاني تبع حد.
وأردف حسن حديثه قائلا: اتحاد الكرة مش بيدي فرصة لمدربين تانيين، وبيمشي حسب المزاج، مش الخبرات والتفوق الفني والموهبة.
وعاتب إبراهيم حسن، اتحاد الكرة المصري بسبب الطريقة التي يتم بها إدارة الكرة المصرية، قائلًا: حازم إمام ومحمد بركات الثنائي الذي يدير الكرة المصرية حاليا، وعايز أعرف إيه الخلفيات بتاعتهم عشان يديروا الكورة المصرية، نجحوا في إيه قبل كدة.
وواصل نجم الكرة المصرية السابق: لازم يبقى ناس بتدير عندهم خبرات ونجاحات قبل كدة، مش أجيب ناس واجهة وخلاص، وجمال علام رئيس اتحاد الكرة حاليا مُجمد منذ تصريحاته الأخيرة اللي قال فيها عندنا شوية دولارات عايزين نصرفهم.
كما يرى إبراهيم حسن أن اختيار روي فيتوريا لتدريب منتخب مصر الوطني مُخاطرة كبيرة، مؤكدًا أنه مدرب أندية وليس منتخبات وكنت أتمنى مراعاة هذه النقطة.
وأكمل إبراهيم حسن: التعاقد مع روي فيتوريا مخاطرة حتى لو هو مارادونا لكن التعاقد معاه وهو معندوش خبرة المنتخبات قبل كدة مخاطرة، واتحاد الكرة بيختار المدربين بنية مش صافية وعشان كدة ربنا مش بيبارك.
وأردف حسن: بالنسبة لخلاف روجيرو ميكالي مع عصام الحضري، ازاي يتم عقد جلسة صلح، ده رئيس جهاز فني وفي واحد منفذش التعليمات ازاي يتم عمل جلسة.
وواصل حسن: ازاي المسؤولين في اتحاد الكورة كانوا بيحاولوا يقنعوا روي فيتوريا بوجود عصام الحضري في الجهاز الفني هل ده ينفع؟.
واختتم حديثه قائلا: هاني أبوريدة خلاص اتعودنا منه على إن ولاده هما اللي لازم يبقوا موجودين، والناس عارفة الكلام ده بس محدش بيتكلم.
