عادل إمام بيهتم باللي قدامه وبيظبط الإفيه.. ملخص تصريحات سوسن بدر في برنامج معكم
حلت الفنانة سوسن بدر ضيفة على الإعلامية منى الشاذلي ببرنامج معكم، وتحدثت خلال الحلقة عن كواليس عملها الأخير الفيلم الوثائقي أم الدنيا، وكذلك عن ذكرياتها مع الفنانين في بدايتها.
وإليكم أبرز تصريحات سوسن بدر حلال الحلقة:
-كل اللي يهمني أكون ممثلة جامدة جدًا وعمري ما خدت بالي من جمالي ولا اهتميت ولغاية النهاردة عندي معجبين كتير.
-المخرج شادي عبد السلام هو أول واحد دخلني مغارة مصر القديمة وهو اللي رشحني أعمل دور نفرتيتي.
-في مسلسل أحلام الفتى الطائر كان فيه مشهد في العربية وأنا عمري ما ركبت عربية ولا بعرف أسوق بس قولت للمخرج آه طبعا بعرف واتفتحت في العياط في تصوير المشهد وأستاذ محسن نصر صعبت عليه وعمل المشاهد البعيدة مكاني والمشهد القريب علموني السواقة.
-حصلت على مجموع محترم ودخلت كلية علوم وأنا مكنتش بحبها وحسيت فيها بالغربة.
-أول دور مثلته فى المعهد كان أحلام الفتي الطائر لعادل إمام وحبيبي دائما كان أول دور لي فى السينما.
-عادل إمام بيهتم باللي قدامه وبيكون عايز يطمنه ولو لقى ممثل مهما كان حجم دوره عنده شكل إفيه حلو بيظبطه ويخليه يقوله.
-سعيد صالح كان مرح فى اللوكيشن وطول الوقت بيحب يهزر ويهرج في كواليس سلام يا صاحبي.
أم الدنيا
وتعد سلسلة أفلام أم الدنيا آخر أعمال الفنانة سوسن بدر، وكانت مكونة من 15فيلم درامي وثائقي تاريخي، يسرد تاريخ مصر من وجهة نظر مصرية في إطار تشويقي، بسيط وملم لاستيعاب تاريخ مصر منذ بدايته وحتى العصر الحديث، وهو من إخراج وتأليف محمود رشاد.
