عمر خورشيد: اعترضت على مشاركة بلوجر في أحد أفلامي.. والتيك توك شيء رخيص
علق الفنان عمر خورشيد، على ظاهرة تحول مشاهير السوشيال ميديا لـ ممثلين ومشاركتهم في أعمال فنية خلال الفترة الماضية.
وقال عمر خورشيد في تصريح لـ القاهرة 24: أنا من ضمن مشاهير السوشيال وهما ناس لطيفة ودمهم خفيف، ولكن أنا ضد فيديوهات التيك توك والبلوجر والجو ده وشايف إنه رخيص أوي.
وتابع: حصل في فيلم مضيته لقيت المنتج جايب واحد وومديله 7 مشاهد يعني دور، وبسأله ده خريج معهد السينما؟ قالي لأ ده عنده صفحة على التيك توك وعليها 2 مليون متابع ومشهور وهيعمل لنا دعاية.
وأضاف: قولتله أنا تمام ولكن إعتراضي الوحيد لو هو نقابيًا تمام وجبتله تصريح نقابي يبقى تمام مفيش مشكلة، وأي حد ممكن يمثل طول ما عنده الموهبة، الموضوع مش حِكر علينا.
عمر خورشيد
وسبق وتحدث الفنان عمر خورشيد، عن سبب قِلة أعماله الفنية، موضحًا: الفنان سلعة وأنا مفيش عليا طلب دلوقتي، ومش معنى كدة إني مش شغال، لأن أنا شغال وكل سنة بعمل عمل، بقالي حوالي 5 سنين عملت 4 أفلام ومسلسل ولا واحد فيهم نزل، واحتمال المسلسل يكون نزل على منصة ولكن مفيش حد شافه ومحدش حس بيه، ده كان بطولتي اسمه وجع البنات.
وأضاف عمر خورشيد، أن هذه الأفلام لم تطرح بالسينمات حتى وقتنا هذا ولا يعلم سبب عدم بيعها وتوزيعها: الأفلام لسة لغاية دلوقتي منزلتش، وأنا كممثل للأسف وظيفتي بتنتهي لما دوري بينتهي، فماليش علاقة بالتوزيع.
