فيفي عبده: بنتي خريجة جامعة أمريكية ومتعرفش عربي.. وخدت عين قعدتني 3 سنين
كشفت الفنانة فيفي عبده، سر كلمتها الشهيرة 5 مواه، مؤكدة أنها من أوائل مشاهير السوشيال ميديا، بجانب حديثها عن أبرز أعمالها الفنية، وتحضيراتها لمشاركتها في الموسم الرمضاني 2023.
وقالت فيفي عبده، خلال تصريحات تلفزيونية: موضوع 5 مواه، بدأ في سناب شات، أنا أول واحدة دخلته مصر كان وقتها فيس بوك لسة بيقول يا هادي، وكان عندي نسب مشاهدات عالية جدًا، وكنت بحاول أدخل العالم العربي مع مصر وكنت أون لاين كل يوم وبوريهم أنا بعمل إيه في يومي، ونشوني عين وقعدت عيانة لمدة 3 سنين والحمد لله ربنا نجاني منها، وكنت بقول لبنتي اعملي 5 مواه للفانز بتوعي.
وأضافت فيفي عبده: بنتي خريجة جامعة أمريكية ومتعرفش عربي أوي، وكنت جايبة ليها مُدرس عربي عشان لازم تعرف دينها، ولكن مكانتش عارفة تكتب 5 مواه، ومن هنا جه علامة إيدي 5 مواه، والناس بتفكر إني بخمس في وشهم، وعملت المصطلحات بتاعتي مع الفانز بتاعي، والعالم كله بقى يتكلم إنجليزي أكن مكنش فيه إنجليزي قبل كده.
فيفي عبده في رمضان 2023
وكشفت الفنانة فيفي عبده، أنها تحضر لعمل للمشاركة به في رمضان 2023، كما ستقدمه على منصة إلكترونية، موضحة: عندي أعمال كتير جدًا بقرأها وبحضرها علشان رمضان، وهعمل منصات ودي أول مرة أعمل حاجة على منصة لـ رمضان، وببقى هلكانة في رمضان ولكن بيبقى كويس ورمضان اللي فات كان كويس الحمد لله واتبسطت بالشغل مع شيرين رضا في مسلسل شغل في العالي، وكانت تجربة جميلة جدًا كلها شباب وأنا معاهم.
فيفي عبده
وأشارت الفنانة فيفي عبده، إلى أنها تنبأت بنجاح مسرحيتها حزمني يا، موضحة: مسرحية حزمني يا كنت متنبأة لها بالنجاح من قبل ما أعملها، الجمهور كان بييجي من السفر يشوفوها ويطلعوا على الطيارات تاني والكل طلع منها أبطال، زي مسلسل كيداهم كسرت بيه الدنيا لأنها ظهرت فيفي عبده اللي جوايا، وعملت أدوار الأم كتير لأني بثبت نفسي من خلال الدراما.
وأضافت فيفي عبده، أن نجوم الوسط الفني حرصوا على تهنئتها بمناسبة مسلسل الحقيقة والسراب، قائلة: عملت ثريا أبو الفضل في مسلسل الحقيقة والسراب كانت شخصية مشهورة جدًا، شويكار وفؤاد المهندس وكل الفنانين كلموني علشان مشهد وفاة ابني في مسلسل الحقيقة والسراب، قالولي عملتي المشهد إزاي؟ وكانوا فرحانين بيا، والمسلسل كان ناجح جدًا.
