وفاء مكي: مين محمد رمضان عشان أشتغل معاه؟
كشفت الفنانة وفاء مكي سبب رفضها العمل مع محمد رمضان، مؤكدة أن العمل لم يناسب تاريخها الفني، كما تحدثت عن معاناتها مع الديون ومرورها بأزمة مالية.
وقالت وفاء مكي لـ القاهرة 24: فيها إيه لما أرفض أشتغل مع محمد رمضان هو مين؟ أنا عملت 86 بطولة، عايزني أرجع تافهة وهايفة؟ أنا مش جاية من على السلم وعملت 86 بطولة وأعمالي تشهد لي، ولازم أرجع بتاريخي ومحدش يرمي لي دور أي كلام، وفيه فنانين كتير من غير شغل يا ترى عندهم قضية زيي؟
كما سبق وعلقت وفاء مكي على الهجوم التي تتعرض له باستمرار بسبب قضية تعذيبها لـ خادمتين، وقالت في تصريح سابق لـ القاهرة 24: أنا لما اتحبست طلعت اشتغلت بالـ 5 أعمال لأني بصرف على يتامى وأمي مريضة ودلوقتي مبقتش عارفة أجيب لها علاج، وأنا مش إعانة أو بشحت دا أنا بطلب أكل من عرق جبيني، واللي هيتكلم على قضيتي عنده حقد لأن القضية بقالها 20 سنة وأنا واحدة عارفة ربنا وبيني وبينه عمار.
وواصلت وفاء مكي: أنا قضيتي بسيطة دا فيه فنانين خرجوا من قضايا دعارة واشتغلوا عادي؟ مش فاهمة ليه الناس بتتكلم على قضية بقالها سنين والموضوع خلص، وإيه علاقة الشغل بالقضايا والمشاكل الشخصية؟
آخر أعمال وفاء مكي
وعلى جانب آخر، قدمت وفاء مكي العديد من الأعمال الفنية التي حققت نجاحا كبيرا، من بينهم مسلسل ذئاب الجبل في دور مُهجة، ومسلسل شخلول، وعد حر، البحث عن السعادة، وغيرها من الأعمال.
