سعيد جميل: قلت لـ رضوى الشربيني مش مقتنع باللي أنتِ بتقوليه.. وأنا ضد اختزال طلبات الراجل إنه يدوس على السجادة
كشف الإعلامي سعيد جميل تفاصيل اللقاء الأول الذي جمعه مع الإعلامية رضوى الشربيني في برنامجها، كما تحدث عن العلاقة القوية التي جمعتهما سويًا.
وأعرب الإعلامي سعيد جميل عن سعادته الشديدة بمشاركته في حلقة من برنامج الإعلامية رضوى الشربيني، وذلك من خلال ندوته مع القاهرة 24، إذ قال: رضوى الشربيني قعدت معاها قولتلها كل اللي أنتي بتقوليها ده مش مقتنع بيه وعندي وجهة نظر تانية، قالتلي عندك الشجاعة إنك تطلع معايا وتقوله، قولتلها اه أطلع، وأنا كنت رايح قلقان شوية، ورضوى كان بقالها كتير في العمل، وأنا جبت ورقة وقلم وجهزت وكلمت الرجالة، وأنا رايح شايل حاجات كتيرة، وادوني فرصة كاملة إني أشرح مواضيع الرجالة، وأول برنامج يخلي الراجل يتكلم في مواضيع مهمة بشكل منطقي وكوميدي.
وأردف الإعلامي سعيد جميل: فيديوهاتي أنا ورضوى كسرت مصر، فجأة لقيت الفيديوهات منتشرة، وفي الحلقة قالتلي ممكن تطلع معايا جزء ثاني، وكان أقوى من الجزء الأول، ومع احترامي لكل الأصوات أنا ضد نختزل طلبات الراجل إنه يدوس على السجادة وإنه يأكل الورك أو الصدر، لكن مراتي تقف جنبي أما أتعب في الظروف الاقتصادية وتنزل تساعدني ومتعايرينش.
وتابع الإعلامي سعيد جميل حديثه عن تفاصيل برنامجها أنا سعيد، حيث قال: كنت في الأول واخد صف إني أسمع الرجالة بس لقيت إن مينفعش أخد صف الرجالة بس في هوانم في مصر تعبانة، والست اللي جوزها كان بيبهدلها، وأنا وقفت في نص الحلقة، وقولتلها أنا بحييكي أنتي من هوانم مصر، وهي فعلا من الهوانم استحملت بلاوي سودة، وإزاي نغض البصر، وخدنا الموضوع بشكل كوميدي.
سعيد جميل: إحنا كمصريين لو عندنا مشكلة بنضحك عليها
واختتم الإعلامي سعيد جميل حديثه: إحنا كمصريين لو عندنا مشكلة بنضحك عليها علشان نعرف نعيش، وده سر قوة المصري إنه ميتهزمش، وأنا في حلقة من الحلقات قولت استعمار دخل بلاد كتيرة وبيتكلموا فرنساوي وإنجليزي، إحنا عندنا هنا خلينا الخواجة يقول إزيك يا حبيبي تعالى أشرب شاي، خليناه يتكلم مصري، مع احترامي لكل البلاد اللي حوالينا مهما هما أقوياء وعندهم حاجات كتير، والنكهة المصرية مختلفة.
