مرتضى منصور: كهربا مش هيلعب قدام الزمالك تاني.. وصفحات الزملكاوية تُفسد الصفقات
عقد مرتضى منصور، رئيس نادي الزمالك، مؤتمرًا صحفيًا، للتحدث عن توابع سقوط الفريق الأول لكرة القدم بالنادي أمام فريق الأهلي بثلاثية نظيفة، في قمة الدوري المصري الممتاز.
تصريحات مرتضى منصور
وقال منصور بالمؤتمر الصحفي: كل الإمكانيات متوفرة لفيريرا واللاعيبة، إزاي أعاقب لاعيبة واقفة على رجليها لحد الدقيقة 60، كل التوفيق للولاد في مباريات غزل المحلة وفيوتشر وفاركو، وأيا كانت النتائج المجلس اتخذ قراره.
وأضاف: بقول للجمهور خليكم ورا ناديكم أنتم جمهور عظيم، كلنا نمنا إمبارح حزانة، احنا واقفين ورا النادي اوعوا تفقدوا ثقتكم في اللاعيبة، هما هما اللي حققوا الدوري والكأس، محصلش تغيير زاد عليهم 11 لاعب على أعلى مستوى.
وواصل منصور: نعتذر لأننا كمجلس إدارة مسئولين وكنت رافض التدخل في القرارات الفنية، ولكن مش معقول مواجهة كل الفرق بنفس الطريقة، احنا صبرنا ونتمنى الـ3 مباريات الجايين يعدوا، وأيا كانت النتائج المجلس اتخذ القرار سواء باستمرار فيريرا أو توجيه الشكر له.
وأردف: لسه عندنا بطولات كتير الموسم ده مبنرميش الفوطة، هنكمل بلاعيبة رجالة وفيريرا سواء قاعد أو ماشي مش هنعلن إلا بعد الـ3 مباريات الجايين، كلنا نمنا إمبارح حزانة بس في الآخر هي دي الرياضة.
وتابع: بقول للخطيب عندك لاعب هربان لاعبته عندك لاعب عمل حركة خارجة للجمهور، وبيسأل مدير الكرة بتاعه هلاعب الزمالك امتى تاني؟ بقوله مش هتلحق والله ما هتلحق، والنهاردة هنجهز الفيديو اللي كهربا بيسيء فيه للزمالك ومستني أشوف هيحصله أيه، ده الجمهور اللي بيتجاوز بيتوقف.
وعن صفقات الزمالك، قال: نفاوض على 3 صفقات وبعض الصفحات الزملكاوية والمواقع بتبوظ الصفقات، الحديث عن الصفقات يتسبب في ارتفاع أسعار اللاعبين، وأقرب مثال لاعب كان مطلوب فيه 500 ألف دولار، أصبح المطلوب فيه 2 مليون دولار، وتم الاستقرار على عودة محمود شبانة من سموحة.
واختتم رئيس الزمالك: بقول للاعبي الزمالك، لاعيبة الأهلي زملاءكم، لازم تتعاملوا معاهم كويس داخل الملعب أو خارجه، وأي لاعب الإسماعيلي هيطلب ضمه لو المدرب مش محتاجه يمشي.
