طارق الدسوقي: عمري ما طلبت شغل من منتج.. ومعنديش حاجة أخجل منها
قال الفنان طارق الدسوقي، إنه على الرغم من غيابه 10 سنوات عن الساحة الفنية إلا أنه لم يطلب من أي منتج أو مخرج ترشيحه في أي عمل، مُشيرًا إلى أن الوسط الفني في الوقت الحالي يعتمد على القليل من الشللية.
وأضاف طارق الدسوقي، في تصريحاته لـ القاهرة 24: الوسط الفني دلوقتي فيه بعض الشللية، يعني ممكن نلاقي كام اسم مع بعض دايمًا في المسلسلات أو مع مخرج معين، بيبقوا عاملين جروب كده بيشتغلوا بيه دايمًا.
وأكمل: أنا بقالي 10 سنين غايب عن الساحة الفنية ولكن أنا مش ممكن أعلن اعتزالي الفن لأني عارف قيمة الفن وأهمية الدور اللي بيلعبه الفنان، أنا عملت 80 مسلسل و15 فيلم و15 مسرحية مفيش فيهم عمل تافه أو مبتذل، وأتحدى حد يجبلي مشهد أو برنامج قُلت فيه كلام وبعدين قُلت كلام ضده، أنا عارف أنا بقول إيه ودي مسأل مهمة جدًا ومعنديش حاجة أخجل منها الحمد لله وعايز أستمر للآخر كده.
طارق الدسوقي: عمري ما طلبت من منتج شغل
وأكد الفنان طارق الدسوقي، أنه لم يسبق له أن طلب من منتج أو مخرج ترشيحه في أي عمل من الأعمال الفنية طوال فترة غيابه عن الساحة: وأنا بعيد عن الفن عمري ما رفعت سماعة تليفون على مخرج أو منتج وقُلت له عايز اشتغل، ولا عمري طلعت في برنامج تلفزيوني واشتكيت إني مبشتغلش وفي نفس الوقت معتكفتش ولا قاعد في البيت ولا مكتأب، أنا بمارس دوري التوعوي والتثقيفي على أكمل وجه، لأني أستاذ في الدراسات العليا في كلية الآداب جامعة القاهرة، وأنا المستشار الفني والثقافي لمؤسسة التعليم أولًا، ورئيس لجنة الثقافة والإعلام في حزب المصريين الأحرار، وأنا أكتر فنان زورت جامعات مصر وبعمل ندوات مفتوحة مع الطلاب.
