محمد عز الدين: حاولنا نعيد فكرة دفئ العائلة في موضوع عائلي.. وقدمنا نماذج من المجتمع
أعرب المؤلف محمد عز الدين عن سعادته برد فعل الجمهور على نجاح مسلسل موضوع عائلي الجزء الثاني، مشيرًا إلى أن صناع العمل حاولوا إعادة دفئ وتجمع العائلة المصرية.
وقال المؤلف محمد عز الدين في تصريحات خاصة لـ القاهرة 24، إن صناع مسلسل موضوع عائلي حاولوا تقديم عمل يحاكي العائلة المصرية، موضحًا: فكرة المسلسل من البداية هي فكرة المخرج أحمد الجندي، ودي حاجة كلنا حبيناها وحبينا فكرة أننا نعمل حاجة تشبه مسلسلات زمان.
وأضاف محمد عز الدين: كان عجبنا فكرة دفئ العائلة، ومكنش فيه الغرض أننا نعمل مسلسل يكسر الدنيا، أحنا فكرتنا أننا نعمل مسلسل اجتماعي دمه خفيف شخصيات حقيقة قريبة من الجمهور، نماذج موجودة حوالينا.
وأكمل محمد عز الدين: حكاية المسلسل أن أب عرف أن عنده بنت وهي عندها 20 سنة، واختارنا النماذج اللي تكون قريبة للناس، يعني زينب كل بيت في زينب وكل عائلة فيها رمضان الراجل اللي عدى سن الـ 50 وقاعد في البيت وبيتفرج على التليفزيون ويقعد على الكنبه، فاخترنا نماذج شبه الجمهور المصري، والحمد لله أن الموضوع عجب الناس.
وعن نجاح الجزء الثاني، علق محمد عز الدين: الجزء الثاني حقق نجاحًا أكبر من الجزء الأول، ولكن إحنا بنعمل العمل مبنكونش متوقعين أيه اللي هيحصل بعدها، إحنا بنعمل اللي علينا وبنشوف بعدها رد الفعل ده وبنحاول نعمل حاجة الناس بتحبها، ورد الفعل ده في الآخر دي حاجة بتاعت ربنا، والجزء التاني عمل رد فعل ألطف من الجزء الأول وبرضو الأول حقق نجاح لطيف والناس راحت تشوف الجزء الثاني بعد رد فعل الجزء الأول.
مسلسل موضوع عائلي 2
العمل من بطولة الفنان ماجد الكدواني، نور اللبنانية، رنا رئيس، سما إبراهيم، طه الدسوقي، محمد رضوان، وهو فكرة وإخراج أحمد الجندي وتأليف محمد عز الدين، وعُرض مؤخرًا على منصة شاهد.
