باسل ألزارو: مسلسل حكاية أسيل يعتبر المقبّلات قبل رمضان.. وبدرية طلبة بترمي إفيهات من غير قصد
تحدث الفنان باسل ألزارو عن الصعوبات التي واجهتهم في تصوير مسلسل حكاية أسيل، كما تحدث عن الفنان بدرية طلبة، التي أشاد بخفة ظلها.
وقال باسل ألزارو، خلال حواره مع القاهرة 24: أصعب حاجة واجهناها في التصوير هو إننا بنلبس في المشاهد لبس تقيل وكوفيات في درجة حرارة 30.
وتابع قائلًا: والسفر للفيوم كان صعب، خصوصا إني بروح وبرجع كتير بسبب إني بصور مسلسلين في وقت واحد، وحاجة كمان إننا ملزمين بوقت محدد فـ مضطرين نصور في اليوم مثلًا 20 مشهد.
وتابع متحدثًا عن بدرية طلبة قائلًا: أستاذة بدرية طلبة ألذ واحدة على كوكب الأرض وليا مشاهد معاها كتير في المسلسل، وأول مشهد بيني وبينها قعدت أضحك، والمخرج قالها إحنا مش عايزين نضّحك الناس في الدور ده، بس غصب عنها لقينا المشهد اللي مش مكتوب فيه ولا إفيه بقى فيه 8 إفيهات، هي من غير قصد بترمي نكت.
واختتم باسل ألزارو، كاشفًا موقفه من توقيت عرض المسلسل، وقال: توقيت المسلسل مخوفناش خالص بالعكس أنا بعتبر إن إحنا مقبلات رمضان، لأن بعد رمضان الناس هتكون تعبت من كم المسلسلات اللي شافتها، ومش هتكون قادرة تتفرج على حاجة تاني، ف إحنا جايبين للناس قصة لايت فيها قصة رومانسية جميلة وألوان وبحيرات، ف كأني بحطلكم المقبلات قبل الغدا.
باسل ألزارو يتحدث عن دوره في حكاية أسيل
على جانب آخر، تحدث باسل ألزارو عن دوره في حكاية أسيل، في لقائه مع القاهرة 24، وقال: مبسوط جدًا وطاير من الفرحة، وتعتبر أول بطولة ليا أنا وثراء مع بعض، وإحساس البطولة جميل ومرعب، عشان إحنا علينا مسئولية إن المنتجة بتقولنا إحنا بنبيع بأساميكوا، فـ الموضوع مقلق شوية، بس إحنا بنعمل كل اللي نقدر نعمله.
