ميدو: تسريب أخبار رحيل فيريرا قبل مباراة الترجي غلط.. والزمالك لو كسب هيتأهل
انتقد أحمد حسام ميدو، نجم الكرة المصرية السابق، الأنباء التي ترددت بشأن رحيل جوسفالدو فيريرا عن تدريب الزمالك حال التعثر أمام الترجي التونسي في دوري أبطال إفريقيا.
تصريحات أحمد حسام ميدو
وقال ميدو في تصريحات تلفزيونية: لاعبو الزمالك لازم تتكاتف في الوقت الحالي، والنادي مر بظروف صعبة كتير على سبيل المثال وقت الكونفدرالية، وبالاتحاد والاجتهاد وإن كل واحد عمل اللي عليه، الزمالك كسب البطولة في النهاية.
وأضاف أحمد حسام ميدو: لما الناس تنادي باللجان المؤقتة في الوقت الحالي الصعب، يبقى ده غلط، والزمالك هيدخل في نفق مُظلم تاني، وأنا أول واحد قولت إن مرتضى منصور هيحق له الترشح في رئاسة الزمالك مجددا لو تم إزالة عضويته.
وتابع نجم الكرة المصرية السابق: الزمالك في موقف صعب جدا، ولكن معدن الرجال بيظهر في الأوقات الصعبة وكل أبناء الزمالك متحدين ولديهم صبرا.
وعن فيريرا مدرب الزمالك قال: الأخبار اللي خارجة من النادي بتقول إن فيريرا هيمشي لو الفريق خسر أو تعثر أمام الترجي، وده مينفعش يخرج من النادي، اللاعيبة لما تعرف إن المدرب ده ماشي لو حقق نتيجة سلبية مش هيبقى عندها دوافع، واللاعيبة لازم تعرف إن المدرب ده قاعد، ومكمل، حتى لو كانت الأخبار دي حقيقة.
ووجه أحمد حسام ميدو، رسالة خاصة للاعبي الزمالك قبل مواجهة الترجي التونسي في دور المجموعات من دوري أبطال إفريقيا هذا الموسم، قائلًا: لاعبي الزمالك لازم يتحملوا المسئولية، ولو اللاعيبة متحملتش مسؤوليتها تمشي الموسم الجاي، والزمالك مش بيقف على حد، ودي رسالة لازم يعرفها كل لاعب في الزمالك.
واختتم ميدو: الزمالك لسة عنده فرصة يتأهل ولو كسب الزمالك الـ 3 ماتشات اللي جاية، هيصعد ولسة بإيدينا، ماتش الترجي حياة أو موت، ولو الزمالك كسب الترجي هيتأهل، وافتكروا كلامي.
