أنوش في اعترافاتها بالتحقيقات: لقيت الطبخ مش جايب مشاهدات فقررت أبيّن جسمي | خاص
حصل القاهرة 24 على نص التحقيقات في قضية أنوش، بعد القبض عليها بتهمة الفسق والفجور، وإبراز مفاتنها مصحوبة بعبارات وتلميحات وإيحاءات جنسية قاصدة الإغراء.
نبوية صاحبة قناة يوميات أنوش
استدعت جهات التحقيق نبوية أنوش وجاءت أقوالها كالآتي: أنا عملت صفحة على الفيس بوك، من حوالي 5 سنين، وهي صفحة أسمها نشوى جمعة وأنا قفلت الصفحة ديه من سنتين، بعد ما بنتي اتوفت قفلتها ومكنتش بخش عليها، وكانت صفحة شخصية ومكنتش بعمل فيها أي فيديوهات ولا حاجة، بس قفلتها بعد وفاة بنتي في شهر 10 لسنة 2022.
وأصافت: أول صفحة عملتها في شهر نوفمبر لسنة 2021، والفكرة جاتلي لما فتحت اليوتيوب وشوفت اللي بيعملوا اليوميات، فأنا قولت اشتغل وأعمل زيهم وأجيب مصاريف لأن القنوات ديه بتكسب فلوس، لأن أنا كنت بشوف إن أصحاب القنوات دول بعد فترة بيغيروا شقق وبيغيروا ملابس وبيبان على شكلهم إنهم كسبوا فلوس من خلال المشاهدات.
وتابعت: أنا اخترت اليوميات وأسرار مطبخ بس كان عندي تحفظ على اليوميات، لأن الستات فيها كانت بتطلع بشكل شبه عريانة، فأنا قولت اشتغل في اليوميات بحرص لأنها بتجيب مشاهدات أكثر من قنوات الطبخ، وأن أنا أكون واخدة بالي من لبسي وما أبينش أجزاء من جسمي، فأنشأت 3 صفحات على اليوتيوب، وأول صفحة اسمها عالم نشوى، وأنا اللي قمت بإدارتها في شهر 11 لسنة 2021، وأنا كنت فيها بطبخ أكلات عادية، وأنشأت الصفحة ديه عشان أزود دخلي لأني قاعدة في البيت وكنت عايزة حاجة تشغلني بعد وفاة بنتي.
وأكملت نبوية أنوش في اعترافاتها أمام جهات التحقيق: لكن صفحة الطبخ مجابلتيش فلوس، عشان مكنش عليها مشاهدات، ومكنش فيه حد بيشاهدني وكنت بحاول أزود مشاهدتها بس معرفتش، فعملت درعين واحد يوتيوب وواحد تيك توك بنفس اسم الصفحة عشان الناس تفتكر إن أنا مشهورة وأخش أزود المشاهدات، وقولت هعمل الروتين اليومي وأحاول أبين جسمي عشان أجيب مشاهدات وده اللي حصل.
