محمد سامي: محمد رمضان ممثل استثنائي وبينا توافق ذهني.. وهالة صدقي مفاجأة مسلسل جعفر العمدة
تحدث المخرج محمد سامي عن مسلسل جعفر العمدة، بطولة الفنان محمد رمضان، المقرر عرضه في موسم رمضان 2023، كما كشف عن سبب نجاح أعماله معه.
وكشف محمد سامي القصة التي ستدور أحداث مسلسل جعفر العمدة حولها، خلال لقائه مع شركة ميديا هب، وقال: هو مسلسل فكرته بتدور حول راجل له هيبة في منطقة السيدة زينب، وحصل له حادثة قديمة في حياته إن ابنه اتخطف من وهو عنده يوم، وبعدها بنشوف رحلته وهو بيدور على ابنه وهو معاه، يعني بيدور على حاجة موجودة.
تابع سامي كاشفًا سبب نجاح أعماله مع محمد رمضان دائمًا، وقال: إحنا عشان متفاهمين وبينا تعاون وبنعرف نفكر مع بعض، وبينا توافق ذهني، وأنا عمومًا مخرج بيخلي الممثل اللي معاه يمثل بأريحية، لذلك ده واضح في أعمالنا مع بعض، وحصلت كتير في تاريخ الفن إن يبقى في مخرج وبطل حصل بينهم نجاحات كتير واستثنائية بسبب التوافق ده.
وأضاف في هذا السياق: أنا دايما بقول إني بحب الجملة بتاعتي اللي بكتبها لما محمد رمضان يقولها، هو عنده إحساس ومشاعر في طريقة توصيل الجملة، سواء هي جملة فيها تراجيديا أو فيها عصبية، وهو ممثل استثنائي وشايف إن أكتر مرة كتبت فيها كلام وصل واتقال من الممثل بشكل وصل للمشاهد كان الكلام اللي كاتبه لـ محمد رمضان.
واختتم حديثه كاشفًا اسم الممثل الذي يعده مفاجأة العمل، وقال: كل الممثلين في جعفر العمدة عاملين شغل حلو جدًا بس الممثل المفاجأة بالنسبة لي هو مدام هالة صدقي، شايف إنها هتكون استثنائية، وأنا بعمل المسلسل مش بقول ده هينجح أو لا، دايما بقول هعمل كل حاجة أقدر عليها واستنى التوفيق من ربنا.
مسلسل جعفر العمدة
على جانب آخر، يشارك في مسلسل العمدة عدد من الفنانين، بجانب محمد رمضان، أبرزهم إيمان العاصي، هالة صدقي، زينة، مي كساب، منة فضالي، دعاء حكم، لمى كتكت، وآخرين، ومن تأليف وإخراج محمد سامي.
