عارفة عبد الرسول: مسلسل بالطو نجح لأنه شبهنا.. وصرخة من قلبي للبنات خليكم عاديين
تحدثت الفنانة عارفة بعد الرسول، عن نجاح مسلسل بالطو، والذي عُرض الفترة الماضية عبر منصة Watch it، مُشيرة إلى أن سبب نجاح العمل هو تجسيده للواقع في قرية بالريف المصري، بجانب توجيهها نصيحة للفتيات.
وكتبت عارفة عبد الرسول عبر حسابها الشخصي بموقع فيس بوك: كلمتين محشورين في زوري حاقولهم ورزقي على الله.. ليه مسلسل بالطو نجح النجاح المدوى ده.. لأنه شبهنا بتاعنا.. مافيش حد ماشافش حتة منه أو حد شبهه في طرشوخ الليف تقول لنفسك فجأة.. آه والله كان بيحصل كده.. إحنا كممثلين ماكناش إحنا.. بس كنا إحنا.
وكشفت عارفة عبد الرسول، سبب اختيار الفنانة مريم الجندي للمشاركة في مسلسل بالطو، قائلة: في كلمة قالهالي المخرج عمر المهندس على جنب كده.. لما كان بيعمل الكاستينج للمسلسل دا عشان يلاقي بنت شبهنا من طبقة متوسطة ومن مدينة في الريف تبقى دكتورة في وحدة صحية في أرياف برضه.. كل البنات لاعبة في شكلها وتاتو وشفايف وحواجب.. كلهم دكتور تجميل واحد عامل قالب واحد.. وقع الاختيار على مريم الجندى...مش عشان هي بنت محمود الجندي ولا أخت أحمد الجندى...ولا عشان هي ممثلة كويسة.. رغم إنها ممثلة ممتازة.. ولاعشان كانت في ورشة أستاذنا خالد جلال ولفت لفة حلوو على المسرح.. اتكحرتت يعنى.. كل ده مكانش سبب لترشيحها للدور.. السبب كان شكلها العادي.. بنتنا.. مننا.
واختتمت عارفة عبد الرسول حديثها موجه نصيحة للفتيات: صرخة مكتومة من قلبي للبنات.. أرجوكم.. حبي شكلك اللى ربنا وهبه لك.. مناخيرك كبيرة شوية وماله دي ميزة.. سنانك معوجة مايضرش دى ميزة.. أرجوكم.. كونوا عاديين.
أبطال مسلسل بالطو
شارك في مسلسل بالطو، عدد كبير من الفنانين أبرزهم: عصام عمر، محمد محمود، محمود البزاوي، سلافة غانم، محمد رضوان، عارفة عبد الرسول، مريم الجندي، والعمل من إخراج عمر المهندس وتأليف أحمد عاطف فياض.
