ميدو: مباراة الهلال كابوس لـ كولر.. وكلنا أهلاوية وزملكاوية عايزين الأحمر يكسب
قال الإعلامي أحمد حسام ميدو، إن السويسري مارسيل كولر، المدير الفني للنادي الأهلي، يعاني بسبب خوض مباراة مصيرية أمام الهلال السوداني مباشرة بعد التوقف الدولي.
ميدو: مباراة الهلال كابوس لـ كولر
وقال ميدو في تصريحات تلفزيونية: كابوس أي مدرب إنه يلعب ماتش قوي بعد التوقف الدولي، لأنه هيكون حاطط ايده على قلبه إن لاعب يتصاب مع منتخب بلاده.
وتابع: أؤكد لكم أن الشناوي سليم وتمرن مع الفريق بشكل طبيعي، والحمد لله إن لاعبي المنتخب راجعين بمعنويات مرتفعة بعد الفوز على مالاوي، بينما معلول ظهر في تدريبات الأهلي اليوم لكنه خاض مرانا منفردا، ومن المهم دلوقتي للأهلي التحضير النفسي لماتش الهلال، بعد رجوعهم من أجواء المنتخب لأجواء الفريق مرة تانية.
ميدو: كلنا أهلاوية وزملكاوية عايزين الأهلي يكسب
وأضاف ميدو: التأهل من المجموعة كان خلاص راح على الأهلي، لكن ربنا له حكمة ويختبر رجولة لاعبي الأهلي وإصرارهم على التأهل، ولو مستغلهاش الأهلي يبقى ميستحقهاش
وواصل: كلنا كمصريين سواء أهلاوية أو زملكاوية عايزين الأهلي يكسب، ومينفعش زملكاوي يتكمنى تأهل الهلال على حساب الأهلي، وكلنا لينا قرايب وأصحاب بيشجعوا الأهلي، ولو هتخير بين تأهل الأهلي أو الهلال، هختار إن الأهلي يصعد وأخويا يفرح.
ميدو: أحذر لاعبي الأهلي من الاستعجال
وتابع ميدو: الاستعجال هيعمل نتيجة عكسية على الأهلي، لازم الأهلي وهو بيهاجم يهتم جدا إنه ميدخلش فيه هدف عشان ميدخلش في حسبة بيرما، المعادلة الصعبة اللي كولر محتاج يفك شفرتها هي ازاي الأهلي يهاجم وفي نفس الوقت ميستقبلش أهداف، ودي محتاجة إن الظهيرين ميندفعوش طول الوقت، مع وجود لاعب ارتكاز رقم 6 قوي.
واختتم: أنا متأكد إن كولر هيشتغل على انصهار اللاعيبة مرة تانية مع الفريق من أول بكرة بعد تجمع الفريق كله، إلى جانب وقفة الفريق الدفاعية وازاي هيشتغل على تعطيل الهجمات المرتدة، وكولر هينبه على اللاعيبة عدم الاندفاع، وخصوصا ياسر إبراهيم، اللي بيبيع نفسه في مواقف الهجمات المرتدة، لازم كولر ياخد حذره من سرعات مهاجمي الهلال.
