غادة عبد الرازق ترد على تصريحات أحمد زاهر: عمري ما اتخانقت معاه ومش مسؤولة عن كلامه
علقت الفنانة غادة عبد الرازق، على تصريحات الفنان أحمد زاهر الأخيرة، تجاهها، والتي أكد خلالها أنه توجد عداوة بينه وبينها من بعد آخر عمل جمعهما وهو مسلسل حكاية حياة.
وقالت غادة عبد الرازق، في تصريحات تليفزيونية: هو بيقول حاجة وهو مش متأكد منها عمري ما كان عندي مشكلة مع أحمد، عمري ما اتخانقت معاه أو شدينا في الكلام، أنا مش مسؤولة عن كلامه، ليلى أحمد زاهر مرشحة معايا لمسلسل تلت التلاتة من البداية لحد دلوقت، حتى لو كان عندي مشكلة مع أحمد عمري ما أدخلها في الشغل.
واستكملت غادة عبد الرازق حديثها قائلة: أنا عندي نظرة في الممثل اللي مش لازم يبقى دايمًا بيعمل الدور ده، راهنت على محمد القس وراهنت عليه أكتر لما عمل كوميدي، هو ممثل شاطر جدًا وعشان كدا هيقدم دور مختلف في مسلسل تلت التلاتة.
أزمة غادة عبد الرازق وأحمد زاهر
وكان الفنان أحمد زاهر قد قال مؤخرًا في تصريحات تليفزيونية: في عداوة بيني وبين غادة عبد الرازق، لكن من ناحيتها هي أنا معملتلهاش حاجة.. ممكن تكون مش بتحبني.. هي حرة مش هجبر حد إنه يحبني، رغم عدم حُبها ليا، لكن هي من أقوى الممثلات في الوطن العربي، وعملنا مع بعض مشاهد حلوة في حكاية حياة.
كما كشف أحمد زاهر كواليس التعاون بينهما في مسلسل حكاية حياة عام 2013، وقال: غادة عبد الرازق مكنتش موافقة إني أكون موجود في المسلسل، ولكن رجعت في كلامها بناءً على كلامها مع المخرج محمد سامي والمنتجة، وبعد ما اتقالي أنت مش معانا صليت ودعيت، ده أنا خسيت سنة عشان الدور ده، وجالي تليفون إني مشارك بالعمل، ولما روحت لقيت طاقة سلبية من جهتها من غير ما أعرف السبب.
مسلسل حكاية حياة عرض عام 2013، وكان من بطولة غادة عبد الرازق، طارق لطفي، أحمد زاهر، خالد سليم، روجينا، أحمد مالك، رزان مغربي، نجلاء بدر، محمود الجندي، والمسلسل من تأليف أيمن سلامة، وإخراج محمد سامي.
