عمر سامي لاعب يد الأهلي: نهائي الكأس من أفضل مبارياتي.. وأحب مواجهة الزمالك| حوار
يُعد عمر سامي أحد أفضل لاعبي فريق كرة اليد بالنادي الأهلي، ومن أبرز العناصر التي ساهمت في عودة لقبي الدوري والكأس إلى القلعة الحمراء هذا الموسم.
القاهرة 24 يحاور عمر سامي
القاهرة 24 حاور عمر سامي، ليكشف سر التتويج بالثنائية المحلية واستعدادات الفريق لبطولة إفريقيا، وما يميز ديفيد ديفيز المدير الفني عن سابقه من المدربين الذين تولوا مهمة تدريب الفريق، فكان الحوار التالي:
ما هو سر عودة الألقاب إلى فريق اليد بالنادي الأهلي؟
ده توفيق ربنا قبل تعبنا ومجهودنا الحمد لله.
لو خيروك أول الموسم بالفوز ببطولة واحدة كانت هتكون إيه؟
الدوري طبعا لأنه كان غايب عن النادي من فترة، وهو أصعب بطولة لأنه بيقيس مستوى الفريق على موسم كامل.
هل كنت تتوقع التتويج ببطولة الدوري والكأس الثنائية؟
هو طبعا بعد المجهود والالتزام الكبير في موسم طويل، التوقع كان موجود وبنمشي خطوة خطوة لأنه موسم طويل والحمدلله ربنا وفقنا في الآخر، وإن شاء الله لسة قدامنا بطولتين ميقلوش اهتمام عن الدوري والكأس وإن شاء الله ربنا يوفقنا.
ماذا أضاف ديفيز المدير الفني للفريق.. وأوجه الاختلاف عن المدير الفني السابق؟
أضاف لينا كتير كابتن ديڤيد ديفيز، وهو من أحسن المدربين في العالم بنثق فيه وفي كل تفصيلة بيقولها وأهم حاجة الالتزام، إحنا ماشيين بشروط الكل مش بيكسرها ودي أهم حاجة.
دور قادة الفريق واللاعبين القدامى قبل المباريات الهامة؟
التحضير الذهني والنفسي طبعًا، بنكتسب منهم الخبرات لأنهم عدوا بالمواقف دي كتير، فدورهم مهم جدًا في التأثير علينا.
تعليمات خاصة كان يمنحها لك ديفيز قبل كل مباراة؟
كان في المحاضرات بيدينا تعليمات خاصة في كل ماتش لكل لاعب وطريقة لعبه.
هل في مرة قلت إن الدوري راح؟
صعب، لأن الدوري ده بطولة على مدار الموسم كله وزي ما شفت اتحسم في آخر ماتش، فمينفعش نيأس في أي وقت في الموسم.
أفضل مباراة لعبتها في الدوري ومثلها في كأس مصر؟
إحنا لعبنا ماتشات كتير في الدوري، بدأته بداية كويسة الحمد لله وكان فيه ماتشات كتير لعبتها كويس بس ممكن آخر ماتش كان فيه أكتر من جول مؤثر في الماتش، وفي الكاس في النهائى برضو من أهم الماتشات.
أكثر فريق ترغب في اللعب أمامه وتنتظر مباراته؟
هو طبعا ماتش الزمالك لأنه المنافس الأول لينا، وكل ماتش قمة بيكون نهائي بالنسبة لينا.
ما هي استعدادات الأهلي لمباريات إفريقيا.. ومتى تبدأ الاستعدادات؟
هنبدأ علطول مفيش أجازة لأن مفيش وقت، البطولة قريبة وإحنا مستضيفين فلازم نكون جاهزين إن شاء الله.
أكثر لاعب تستعد له عندما يلعب أمامك؟
كل اللعيبة بحترمهم وبعملهم حساب، لأن كل ماتش زي اللي قبله ولازم نعدي علشان نوصل للنهاية والمكسب.
رسالة تحب توجهها للجمهور؟
أحب أشكر الجمهور لأنه استحملنا ودعمنا كتير، وإن شاء الله اللي جي كله خير ونوعدهم بأن اللي جي كله بطولات إن شاء الله.
