أوس أوس: تعبنا في فيلم مغامرات كوكو لأن التصوير مع حيوانات.. وكنت أتمنى أعمل دور بلال شامة
تحدث الفنان محمد أسامة الشهير بـ أوس أوس، عن مشاركته في 3 أفلام خلال موسم عيد الفطر، وهي مغامرات كوكو، رمسيس باريس، بعد الشر.
وقال أوس أوس، خلال لقائه مع القاهرة 24، على هامش العرض الخاص لـ فيلم مغامرات كوكو: أنا بقالي 5 سنين مشتغلش سينما، فأنا مكنتش أعرف إن الـ3 أفلام هينزلوا مع بعض، ولكن أفلامي مختلفة عن بعضها، وموسم العيد الناس بتبقى طالعة من رمضان متشبعة بالدراما والتشويق، وبتبقى في العيد عايزين يدخلوا كل يوم فيلم ويضحكوا.
وكشف أوس أوس تفاصيل شخصيته في فيلم مغامرات كوكو، قائلًا: طالع بدور شخص اسمه باسم هو مساعد دكتور كوكو اللي هو بيومي فؤاد، بديله حقنة غلط وبيصحى يلاقي نفسه بيكلم الحيوانات، وبنستغل الموضوع ده إننا بنعالج الحيوانات وفي رسايل كتير في الفليم.
أما عن كواليس تصوير فيلم مغامرات كوكو، فعلق أوس أوس قائلًا: أنا كنت خايف جدًا من الحيوانات في كواليس فيلم مغامرات كوكو، كان في فيلم كلب إسود ضخم، وساب الناس كلها وجري عليا، ولكن الحمد لله عدى على خير، وتعبنا في تصوير مغامرات كوكو لأننا بنصور مع الحيوانات.
كما تحدث أوس أوس، عن مشاركته في فيلم بعد الشر بالتعاون مع الفنان علي ربيع، معقبًا: مبسوط جدًا بتعاوني مع علي ربيع في فيلم بعد الشر، والكيمياء بيننا حلوة وإحنا أصحاب بقالنا أكتر من 15 سنة، ولقينا ورق حلو قدرنا نترجم كيميتنا فيه، والفيلم مختلف وبإذن الله الناس هتستمع بيه.
وعن مشاركته في فيلم رمسيس باريس بطولة الفنانة هيفاء وهبي، أضاف أوس أوس: قعدنا حوالي 18 يوم في فرنسا بنصور، وتعبنا فيه جدًا، ويا رب ده يترجم خير والناس تتبسط بيه.
أوس أوس: ربنا خلقني دمي خفيف ومش هعمل فيلم رعب
وكشف أوس أوس، إمكانية تقديمه نوعية أعمال أخرى غير الكوميدية، قائلا: لو فيه ورق كوميدي أكشن، وطبيعي لازم يكون في عمل كوميدي، وربنا خلقنا دمنا خفيف، والناس بتشوفنا بتضحك، فمش هعمل فيلم رعب، والحمد لله بنحاول ننوع في الأعمال.
أوس أوس: محمد رمضان من الممثلين التقال
وأعرب أوس أوس، عن إعجابه بمسلسل جعفر العمدة، قائلًا: تابعت المسلسلات اللي الناس كلها بتابعها، ومنها جعفر العمدة، ولو كنت شاركت في المسلسل كنت أحب أعمل دور بلال شامة، والناس كلها مبسوطة بالعمل، وده نجاح، ومحمد سامي مع محمد رمضان بيبقوا شكل مختلف، ومحمد رمضان من الممثلين التُقال.
