جت سليمة.. دنيا سمير غانم تشكر فريق العمل وضيوف شرف مسلسلها الرمضاني
أعربت الفنانة دنيا سمير غانم عن سعادتها الشديدة بنجاح مسلسلها الرمضاني جت سليمة، كما وجهت الشكر لطاقم عمل المسلسل وضيوف الشرف.
دنيا سمير غانم تشكر أبطال مسلسل جت سليمة
ونشرت الفنانة دنيا سمير غانم صورًا من كواليس مسلسل جت سليمة، خلال حسابها الرسمي بموقع الصور والفيديوهات انستجرام، معلقة: مشروع كبير تعبنا فيه جدًا عشان نقدر نعمل حاجة تسعدكم جت سليمة شكرًا للمنتج محمد أحمد السبكي الشاطر، اللي مش بيسيب ولا تفصيلة صغيرة غير لما يكون مطمن إنها متنفذة على أكمل وجه شكرًا على مجهودك الكبير، واهتمامك شكرًا المنتج الكبير الأب أحمد السبكي اللي بيحب الفن حب غير عادي، ونفسه دايمًا إنه يقدم أعمال تعجب الناس شكرًا لكريم وخالد السبكي ربنا يخليكوا لبعض.
وتابعت دنيا سمير غانم: شكرًا محمد سلام اللي فعلا بستمتع وأنا بمثل معاه لإن تمثيله وإفيهاته وإحساسه خارج الصندوق، وأعتقد بيبان عليا كل مرة بنشتغل مع بعض شكرًا استاذ خالد الصاوي الجامد أكتر ممثل عنده ضمير في الدنيا، وتفاني في العمل غير طبيعي أنا فعلًا بتفرج عليك، وبتعلم وبسرح في أدائك العبقري اللي فيه الجد ممزوج بالهزار بدرجة مظبوطة جدًا، شكرًا أستاذ سامي مغاوري الفنان القدير السهل الممتنع اللي وجوده بيضيف إضافة غير طبيعية ربنا يديك الصحة شكرا أستاذة هالة فاخر الراقية، قدمت شخصية بإبهار شديد وبتميز، كل مشهد ليكي بيحسسني بسعادة كمشاهدة من قبل حتي ما تتكلمي شكرا محمد ثروت، انت عملت الشخصية بطريقة جديدة وبخفة دم فظيعة كالعادة.
وأردفت دنيا سمير غانم: شكرًا للقديرة المتمكنة سلوى خطاب، نورتينا ووصلتي رسالة عظيمة من خلال إتقانك لشخصيتك، واستحملتي الميك آب الصعب ده لعدد ساعات طويل جدا في سبيل إنك تعملي الشخصية كويس، شكرًا للقديرة سلوى محمد علي أدائك لأم العريف غير متوقع ومش كليشيه تماما، أول مرة أحس إن الساحرة قريبة مننا كده، وإنسانة عادية لكن عندها قدرات وشر وفي نفس الوقت هزار حقيقي أمتعتينا، شكرًا للجميلة رحاب الجمل كنتي لذيذة جدًا بجد وأنا سعيدة أوي إني اشتغلت معاكي لأني من معجبينك، شكرًا مايان السيد الموهوبة جدا البسكوتة المجتهدة اللي تدخل القلب في ثواني، عندك قبول فظيع ما شاء الله وذكاء في التمثيل بيخليكي مميزة جدًا وأنا شخصيًا حبيتك أكتر لما اشتغلت معاكي ربنا يوفقك يا حبيبتي، شكرًا للحلوين كيمز وصلاح الدالي إنتوا فعلًا أثبتوا إن الكوميديان ممكن يثبت نفسه في أي مشهد حتي لو مساحة الدور أقل من قدراته.
واستكملت: شكرا الطفل آدم النحاس عمر أنت بجد ما شاء الله موهوب أوي وفنان أوي وصوتك حلو أوي ما شاء الله والطفل آدم نور رعد أنت شاطر أوي وأقنعتني أوي في الأول وبعد ما اتغيرت كمان برافو عليك، شكرًا للفنان الكبير اللي أنا بعشقه وماقدرش أكون في عمل هو مش فيه بيومي فؤاد أنت أضافتلنا الكوميديا بتاعتك اللي ماحدش بيعرف يعملها.
دنيا سمير غانم تشكر ضيوف الشرف بمسلسل جت سليمة
كما تابعت دنيا سمير غانم توجيه الشكر لضيوف شرف مسلسلها جت سليمة، إذ قالت: شكرًا للنجوم ضيوف الشرف الكبار أوي اللي بجد نورونا، ومحدش اتردد فيهم لحظة واحدة وكلهم جايين مش فارق معاهم حتي إيه الدور اللي هيعملوه أو مساحته قد إيه هم بس جم عشان يقفوا جنبنا، أحمد فهمي أشرف عبد الباقي، كريم عفيفي، عم صلاح عبد الله، سلوي عثمان، إيمان السيد، فتوح أحمد، علاء زينهم، أحمد سلطان، شكرًا المؤلف الجامد كريم يوسف وفريق الكتابة سامح جمال وندى عزت وأشرف نصر، انتوا تفوقتوا علي نفسكوا عملتوا حدوتة فيها كل أنواع الدراما كوميدي ساسبنس خيال فانتازيا كمان اديتوا مساحة للأغاني تكون في مكانها مش مقحمة، شكرًا حسام حبيب المدير التصوير الجامد قوي اللي مش مهم عنده أي حاجة غير أنه يطلع صورة مختلفة ومميزة ولايقة مع مود الحدوتة.
دنيا سمير غانم توجه الشكر لفريق تصوير مسلسلها جت سليمة
وواصلت دنيا سمير غانم: شكرًا لفريق التصوير الجامد شكرًا للعبقري مهندس الديكور سامر الجمال والمهندس أحمد صبري، والمهندسات الشاطرين همسة ورشا انتوا أبدعتوا في وقت قياسي وتعبتوا أوي، والحمد لله تعبكو كان واضح جدا شكرا حسن مصطفي مصمم الازياء المميز جدا، مش ممكن الإهتمام والشطارة حتى في التفاصيل وإكسسوارات الشخصيات كلها، شكرًا مايا حداد الشاطرة جدا كعادتك طبعا جينا بقي للثلاثي اللي حققلي أحلامي في الأغاني سواء في مسرحية آنستونا أو في مسلسل جت سليمة.
دنيا سمير غانم تشكر صناع الموسيقي بمسلسل جت سليمة
واختتمت: شكرًا للشاعر الجامد أيمن بهجت قمر: أنا مش عارفة أقولك إيه بجد إزاي ما شاء الله بتترجم معني الأغنية اللي مطلوبة منك بسلاسة وتميز وفي نفس الوقت مفردات جديدة وقريبك مننا كلنا ما شاء الله عليك شكرا للملحن المميز جدا عمرو مصطفي اللي بيتميز برقي رهيب في الألحان حتي لو بيلحن أغنية شعبية التفوق مش جديد عليك شكرًا للموزع الجامد نابلسي اللي بيبَروِز اللحن والكلام بطريقة خطيرة ومتنوعة في كل أغنية.
