محمد رمضان: بقدم نوع جديد من الأغاني ويمكن بعد 50 سنة يكون باسمي.. ومكنش ينفع أغني غير نمبر وان
تحدث الفنان محمد رمضان عن بداية خوضه تجربة الغناء، مشيرًا إلى أن اللون الذي يغنيه مخلوق جديد لا يشبه الراب أو التراب والمهرجانات ولكنه لون جديد ليس له اسم.
النوع اللي بقدمه في أغانيا مخلوق جديد ومالوش مسمى
وقال محمد رمضان خلال استضافته في برنامج صاحبة السعادة مع الإعلامية والفنانة إسعاد يونس: بعض الموسيقيين سألوني أيه النوع اللي بتغينه وهو مش مهرجان ولا راب ولا تراب، وأنا بقول إن النوع اللي بقدمه نوع جديد ومالوش مسمى يمكن بعد 40 أو 50 سنة يبقى باسمي، ويكون اسمه رمضان لأنه نوع مش موجود وما أتقدمش ومفيش حاجة شبهه ولا حواليه.
مش بنافس بتوع المهرجانات
وأضاف محمد رمضان: أنا مش بنافس بتوع المهرجانات لأني عملت حبيبي مع المغني رقم واحد في فرنسا، وقدمت أغانيا بناء على وعي ودراسة، والموضوع بدأ لما عملت إعلان كان فيه أغنية تخطت حدود الإعلان وبتشتغل في الأفراح والشواطئ، وقدمت شيء عجب جمهوري فهكون مش ذكي لو ما قدمتوش تاني وطورته وحدثته وشيكته وأخدت أفضل ما فيه فعملت مشروع آخر كغنوة مش مستخبي في إعلان.
لو نمبر وان ما كنتش نجحت كنت خسرت الممثل والمغني مع بعض
وتابع محمد رمضان: لما اتجهت للغناء كان ريسك كبير لأن لو نمبر وان ما كنتش نجحت كنت خسرت الممثل والمغني مع بعض، وكان في دماغي أني لو ما نجحتش هبقى عملت زي فلان وخسرت كل حاجة.
وأشار محمد رمضان إلى أنه قبل اختياره لنوع الأغاني التي يقدمها كان يبحث عن نوع المزيكا والكلمات التي تلائم شخصيته، موضحًا: قبل ما أختار النوع بشوف إيه نوع المزيكا اللي يتلائم مع طبيعة صوتي وهل مزيكا شرقي ولا طرب لقيت أقرب نوع مزيكا نوع برازيلي اسمه فان وذاكرته أنا والموسيقار عادل حقي وقال لي الأغاني دي بتنجح، وبعدين دورت على نوع الكلام اللي يتتلائم مع شخصيتي.
وتابع: أنا اللي عامل الأسطورة وقلب الأسد هل ينفع أغني فراقك صعب أو مش قادر أعيش من غيرك أو أنت زي الملايكة لأ يغني نمبر وان والملك فأنا اختارت نوع يليق معايا، وهو نوع أغاني ما فيهوش ريسك لأن أي مطرب بيغني للطرف التاني أنا قررت أغني للذات والنفس وبتبسط لما بلاقي حفلات تخرج والشاب بيقول حطوا لي نمبر وان وأنا بستلم الجايزة.
