أقوال بائع خضار أنهى حياة سائق تروسيكل بالقليوبية: نزلت فيه ضرب بالسكينة
أحمد السيد، شاب بالعقد الثاني من العمر، يعمل سائقا على تروسيكل لمساعدة أسرته البسيطة على تكاليف الحياة، ولكنه لم يكن يعلم أن هذه هي الخروجة الأخيرة التي ستنهى حياته، حيث قابله شخص يعمل بائعا للخضار استدرجه بحجة نقل كمية من الخضروات على التروسيكل الخاص به مقابل مبلغ مادى.
ودون تردد ذهب معه لنقل الخضار على التروسيكل الخاص به، وفي مكان مهجور انقض المتهم على هذا الشاب ذو الجسد النحيف وذبح رقبته من الخلف ليقع على الأرض غارقًا في دمائه، ثم يتوالى عليه بالطعنات في أنحاء متفرقة بالوجه والأنف، ويتركه ويفر هاربًا ويأخذ التروسيكل الخاص به لبيعه.
أقوال بائع خضار أنهى حياة سائق تروسيكل بالقليوبية
حصل القاهرة 24 على التحقيقات في القضية وجاءت أقوال المتهم أمام جهات التحقيق كالتالي: اللي حصل أنى أعرف أحمد السيد محمد وهو صاحبي وعنده تروسيكل بتاعة شغال بيه وأنا بخده وبحمل الزرع علشان أنا بفرش بخضار فى السوق وهو بيجيبهولى، ويوم الثلاثاء 28 / 3 / 2023 اتصلت على أحمد الضهر علشان يجيلى ونروح نجيب زرع وهو جالى العصر في منطقة النعناعية ببندر شبين القناطر وهو كان بينزل زرع هناك لناس غيرى.
وتابع المتهم خلال التحقيقات: بعد ما خلص مشيت أنا وهو بالتروسيكل بتاعه ومشينا لحد لما وصلنا لبعد كوبرى المنشية اللى بقرية منشأة الكرام ووقف بالتروسيكل، واختلفنا على الأجرة وعلى الأستبن بتاع التروسيكل علشان كنت واخده منه، فقلت له خلاص امشى أنت وأنا هجيب حد تاني.
وأضاف المتهم خلال التحقيقات، أن المجني طلع سكينة ومرديش يمشى إلا لما ياخد فلوسه فحصل بنا خناقة ومسكنا في بعض وكان عاوز يضربنى بالسكينة فأنا خدتها منه بإيدى اليمين، وبعد كده رحت جاي ضاربه في جسمه ضربات كتير بس مش فاكر منهم غير ضربتين واحدة في صدره من الناحية الشمال وواحدة في بطنه ومش فاكر باقي الضربات فين لأن إحنا موتنا بعض من الضرب وبعد كده سيبته والسكينة وقعت منى جنبه وخدت التروسكيل بتاعه.
ضربته بسكينة كتير ومش فاكر غير ضربتين منهم واحدة في صدره والتانية في بطنه
وأردف المتهم: وأنا ماشي خبطني بقالب طوب في دماغي من ورا وخدت التروسيكل ومشيت بيه فى طريق المنشية، ده على طول وبعد كده خدت يمين وسألت واحد معرفوش أوصل شبين إزاى فقالى خليك طوالى هتوصل شبين، وخلتنى طوالي لحد ما وصلت مساكن أبو زعبل وأنا عارف الطريق من هناك فخدت طريق شبين لحد ما وصلت قرية الدير مركز طوخ، وسبت التروسيكل عند واحدة اسمها رشا ومعرفش باقي اسمها وهي مشهورة باسم " أم ملك أو أم سعيد " بتفرش في السوق بالخضار، وبعد كده رجعت على البيت وبعدين نزلت السوق والحكومة خدتنى من على الفرش فى السوق وبعد كده خدونى ورحنا جبنا التروسيكل، وبعدين سألوني على الهدوم اللي كنت لابسها ساعة الواقعة فقلت لهم فى البيت وقلت لهم على مكانها وهما راحوا جابوها من البيت فقالوا ليا هي دي الهدوم قلت لهم أيوه، وبعد كده نزلونى على الحجز وهو دا كل اللي حصل.
تعود تفاصيل الواقعة عندما ورد بلاغ من الأهالي لقسم شرطة شبين القناطر، يفيد بالعثور على جثة شخص يدعى أحمد السيد 19 سنة، ملقاة على طريق عزبة السكارنة بالقرب من عرب جهينة بشبين القناطر وبه جرح ذبحي بالرقبة.
انتقال الأجهزة الأمنية لمكان الحادث
على الفور انتقل رجال المباحث، وتبين من التحريات الأولية أن المجني عليه كان في طريقة إلى العمل وأن وراء ارتكاب الواقعة شخص يدعي أ. س 20 سنة عاطل قام باستيقاف المجني عليه لسرقة التروسيكل الخاص به، وعندما رفض قام المتهم بطعنه في الرقبة طعنة أودت بحياته في الحال، وتم نقل الجثة إلى مستشفى شبين القناطر تحت تصرف النيابة العامة، والتى صرحت بالدفن عقب ورود تقرير الصفة التشريحية بمعرفة الطب الشرعي وتحريات المباحث الجنائية حول الواقعة وملابستها وسؤال أهلية المتوفى، وحبس المتهم 4 أيام على ذمة التحقيقات.
