شقيق عروس طنطا المتوفاة خلال التحقيقات: لقيتها غرقانة في دمها ومحدش راضي يقرب منها
قال حازم حمودة القطب، شقيق عروس طنطا بمحافظة الغربية، المتوفاة عقب زفافها بيومين، إثر طعنها من قبل زوجها عدة طعنات متفرقة بالجسد، خلال التحقيقات، إنه خلال تواجده وسط أهالي المنطقة المقيمة بها شقيقته وزوجها علم منهم أنه شاذ جنسيا.
شقيق عروس طنطا المتوفاة خلال التحقيقات: لقيتها غرقانة في دمها ومحدش راضي يقرب منها
وجاءت أقوال شقيق عروس طنطا في التحقيقات كالتالي: أختي المتوفية اتجوزت يوم الاثنين اللي فات، وفوتنا يوم الثلاثاء ويوم الأربعاء أمي راحتلها البيت علشان تطمن عليها من الصبح، وقعدت عندها شوية ورجعت من عندها على الساعة 12:30 الظهر، وسألتها أيه عاملة ايه يا أمي قالتلي كله تمام، قولتلها يعني الدنيا عدت تمام قالتلي أيوة.
وأضاف: كلمت جوزها الساعة 7 بالليل لقيت تليفونه مقفول، فرنيت على أختى المتوفية فردت عليا واتطمنت عليها، وسألتها ليه جوزك مش بيرد عليا قالتلي هو قافل الموبيل ومش بيرد على حد علشان في ناس أصحابة كلموه كتير وهو مش عايز يرد عليهم، فكلمتها حوالي 10 دقائق وكلمت جوزها بعدها اتطمنت عليه وبعد كده قفلت معاهم.
وأوضح: انهاردة الساعة 2 الصبح لقيت جوز أختي بيرن عليا فرديت عليه، قالي الحقني وتعالالي البيت بسرعة، وصوته كان متوتر وخايف، فأنا على طول لبست ونزلت له لوحدي، ولما وصلت هناك لقيته في الشارع والجيران ملمومين تحت البيت عنده فبقوله في إيه قالي الحق أختك بتموت فوق، فأنا جريت على فوق الدور الثاني اللي أختي ساكنه فيه ودخلت أوضة النوم بتاعتها لقيتها مرمية على الأرض على ظهرها وغرقانة في دمها ولقيتها متعورة جامد.
وأكمل: نزلت تحت في الشارع جري وقعدت أزعق هاتوا إسعاف أو دكتور ومفيش حد رضي يطلع معايا، وبعد حبه جه دكتور صيدلي معايا من المنطقة وطلع معايا قاس النبض وقالي البقاء لله أختك اتوفت، وقالي إن الدم ده اتخلط يعني بقالها شوية متوفية، وبعد الصيدلي ما مشي جات عربية الإسعاف لقيتها ميتة مرضيوش يشلوها ومشيوا، وبعدها بحوالي ربع ساعة عربية النجدة جات وطلعوا بصوا على الجثة، وكان في ضابط استجوبني، وخدوا زوج أختي ومشيوا، وأنا في وسط الناس عرفت منهم إن "م. ا. م"، جوز أختي شاذ جنسيا، وبعدها طلعت على مركز شرطة طنطا.
