نادية مصطفى: سامحوا الفنانين لو غلطوا.. ومحمد فؤاد مصري حتى النخاع
تحدثت الفنانة نادية مصطفى عن أغنيتها الجديدة يسلملي ذوقهم، والتي احتفلت بها أمس بحضور عدد من أصدقائها في الوسط الفني، بجانب حديثها عن تصريحات الفنان محمد فؤاد في حفله بمدينة جدة في المملكة العربية السعودية.
علقت نادية مصطفى في لقائها مع القاهرة 24، على إذا ما كانت ستخوض انتخابات نقابة المهن الموسيقية الدورة المقبلة: لسه مسألتش ربنا، أنا في كل خطواتي بعمل استخارة وحتى في غنوتي دي بعمل استخارة، ولما الإذاعة بلغتني أنهم هيشاركوا بغنوة يسلملي ذوقهم في مهرجان في تونس للإذاعات، ولما عملت استخارة قولت لهم توكلوا على الله، وفازت الأغنية أول إمبارح بمركز أول، وهي من ألحان العبقري دكتور إيهاب عبد السلام، وكلمات عماد حسن، أنا فرحانة من كل الجهات.
وعلقت نادية مصطفى على الانتقادات التي لاحقت الفنان محمد فؤاد بعد تصريحاته في السعودية، قائلة: أحيانًا وإحنا واقفين على المسرح مش بنقدر كل حرف بنقوله، لكن بقول لكم الكاميرات ليها رهبة وأكيد ميقصدش كده، ومحمد مصري حتى النخاع، وله أخ استُشهد في حرب أكتوبر وبيحيي حفلات الرياسة، وشوفوا أيام الثورة إحساسه كان عامل إزاي.. راعوا ده.
نادية مصطفى: سامحوا الفنانين لو غلطوا
وتابعت نادية مصطفى: ما أنا ممكن أقول حلمي أغني في السعودية أو تونس أو المغرب، الفن مالوش وطن، وإحنا كلنا واحد.. الجمهور السعودي والعربي على عينا وعلى رأسنا، وكل المطربين العرب بيقدروا جدًا الشعب المصري ودايمًا يقولوا مصر هوليوود الشرق.
وأضافت: متمسكوش على الواحدة لكل فنان وممكن يكون خايف أو مش من مقوماته يتكلم، طبعًا اللي مش عنده مقومات يتكلم يسكت ميتكلمش، انتوا بترعبونا يا جماعة، وأحيانًا بقول مش هطلع في برامج عشان مفيش كلمة تتاخد عليا وأنا معروف عني تلقائيتي.. سامحونا ومتدبحوناش على جملة ممكن تطلع مننا غلط وربنا كريم وغفور.
