أحمد العوضي: اتربيت في بيئة بسيطة وبحس إني سفير للطبقة الشعبية | فيديو
حل الفنان أحمد العوضي، ضيفًا في برنامج صاحبة السعادة والذي تقدمه الإعلامية إسعاد يونس، والمذاع عبر شاشة قناة DMC، وتحدث العوضي عن طفولته وعلاقته بأهالي مسقط رأسه مدينة عين شمس.
وقدمت الإعلامية إسعاد يونس الفنان أحمد العوضي قائلة: أحمد العوضي مكسب كبير وعمل شغل من الدرجة الأولى، وشغله عاد على الدولة بالريادة الفنية، ومكانه على الساحة الفنية ثابتة ورقعته بتتسع، بنحتفي بـ فتوة الغلابة وهو مُصر على هذا اللقب في الحياة، لأن اللقب ده بيتكلم عن بيئته اللي نشأ فيها.
وتحدث أحمد العوضي عن طفولته في منطقة عين شمس، مؤكدًا أنه نشأ بين الطبقة الشعبية ويعتبر نفسه سفيرًا لهم، موضحًا: أنا معتز جدا بنشأتي وبحب طفولتي في عين شمس، ولسة سايبها من قريب، وبحس إني سفير للطبقة الشعبية والطبقة اللي خرجت منها، وطول الوقت بطلع أقول إني فخور بعين شمس، وأنا بعتز جدا بيهم.
وأضاف العوضي: أنا اتربيت في بيئة بسيطة جدا وبيتنا كان 60 متر ووالدي محرمنيش من أي حاجة، ويمكن أنا ناشف شوية عشان أبويا بس اللي رباني، أمي توفت وأنا عندي 9 سنين فمكنش فيه أم. وأي حاجة بنجح فيها لازم أنزل الشارع هناك عشان أشوف رد فعلهم عن ابنهم.
أحمد العوضي يتحدث عن التعاون مع ياسمين عبد العزيز
كما أعرب الفنان أحمد العوضي عن سعادته بالتعاون الثاني مع زوجته الفنانة ياسمين عبد العزيز في مسلسل ضرب نار، والذي حقق نجاحًا كبيرًا في موسم رمضان 2023، وتصدر العمل محركات البحث على مواقع التواصل الاجتماعي.
وقال العوضي: كان لينا هدف أنا وياسمين إننا نقدم حاجة حلوة، ومسلسل حلو عشان الناس مستنيانا بعد مسلسل اللي ملوش كبير، وجت من هنا فكرة ضرب نار.
وأوضح العوضي: مش واخدين قرار إننا نكون ثنائي، حسب الموضوع اللي قدامنا، ولما عملنا اللي ملوش كبير ونجح حبينا نوثق النجاح ده بضرب نار وممكن السنة الجاية منبقاش مع بعض ورمضان اللي بعده نرجع وهكذا.
