صفاء أبو السعود: مفيش خليفة ليا.. والتغيير مطلوب بدل التجمد
قالت الفنانة صفاء أبو السعود إنها لا تحب مصطلح خليفة في الفن، موضحة أن كل شخصية ولها مقوماتها التي تميزها عن غيرها، بجانب حديثها عن أعمالها الفنية المقبلة.
وقالت صفاء أبو السعود في لقائها مع القاهرة 24: أنا مبحبش كلمة خليفة لإن أنا مش خليفة، كل بني آدم حالة وكل واحدة ممكن تبقى أحلى من صفاء أبو السعود ويكون فيها طاقات أكبر، إذن بالتالي هو كل شخص ليه طعم خاص، لو فضلنا كلنا نقول خليفة هنبقى هذا ما وجدنا عليه آباءنا وماشيين عليه على طول مبنغيرش.
وأردفت صفاء أبو السعود: لازم نغير اللي كنا واقفين عليه، لأن لو فضلنا على اللي احنا ماشيين عليه هنبقى غلط وهيبقى تجمد في المجال.
أما عن جديد أعمالها الفنية الفترة المقبلة، فقالت صفاء أبو السعود: بحضر لعمل مع المخرج الدكتور عادل عبده قريب إن شاء الله.
صفاء أبو السعود: غلط إن الفنان يكرر نفسه
وعلقت صفاء أبو السعود، على إمكانية تقديمها أغنية أخرى مرتبطة بالعيد مثل أغنيتها أهلًا بالعيد، قائلة: غلط إن الفنان يكرر نفسه في نفس الموضوع، مهما عمل دي بقت راكزة في دماغ الناس لما بتيجي بنعرف إن ده جرس والعيد جيه، أم كلثوم بتقول يا ليلة العيد صفاء الصبح بتقول أهلًا بالعيد، فمش هعمل نفس الأغنية، ممكن أعمل عمل آخر مبهج فيه سعادة وطاقة، ولكن مش العيد لإنه لخصناها في كلمة أهلا بالعيد.
