اشتغلت شيف وسواق تاكسي قبل الفن ورفضت دور متحرش بسبب أولادي.. أبرز تصريحات علاء زينهم
حل الفنان علاء زينهم ضيفًا على الإعلامي عمرو الليثي في برنامجه واحد من الناس، المذاع عبر شاشة قناة الحياة، وتحدث خلال اللقاء عن تفاصيل مشواره الفني، وكواليس تعاونه مع الزعيم عادل إمام.
ونرصد لكم أبرز تصريحات علاء زينهم في برنامج واحد من الناس
- كنت بشتغل شيف في مطعم والمخرج عاطف سالم بيصور فيلم قاهر الظلام عن قصة طه حسين، وصاحب المطعم قاله إني بمثل في مراكز الشباب وقصور الثقافة وقاله هيعمل دور معايا قريب وفعلا بعتلي.
- لما رجعت من العراق كنت بشتغل فى شركة تأمين فى وسط البلد، وكان معايا تاكسي إسود بعداد اشتغل عليه قبل وبعد الشغل، حتى استطيع أن أكون نفسي واتجوز.
- قولت لصديقي يا سلام ربنا يكرمنا ونشتغل مع الأستاذ عادل إمام، وبالفعل لاقيت واحد صاحبى بيقولي تعالى بكرة تعمل مقابلة مع الأستاذ عادل إمام علشان تشتغل معاه في مسرحية الزعيم.
- كنت بعمل مسرحية العسكري الأخضر وكان هناك مشهد المفروض سيد زيان بيضربني فيه بالقلم وأنا رفضت، وقولتله لو ضربتني هاضربك وبعدها رفضوا استمراري.
- رفضت دور متحرش مع المخرجة إيناس الدغيدي، ولما اتناقشت مع أولادي قالوا لي يا بابا أوعى تعمل الدور ده الناس بتقابلك في الشارع هتقولك إيه؟.
- كان نفسي أشتغل مع أحمد زكي لكن ربنا عوضني واشتغلت مع ابنه هيثم.
- نفسي اشتغل مع ياسر جلال لأني اشتغلت معاه في مسلسل يتربى في عزو وكنت واخد عنه فكرة إنه رخم ومش جدع، لكني لاقيته غير كده وإني كنت ظالمه، وقولت ليه أنا كنت ظالمك.
- أخدت جائزة واحدة في حياتي عن فيلم الماء والخضرة والوجه الحسن، وكان الدور ده هيعمله الأستاذ صلاح عبد الله لكنه كان مريضا، واستأذنته قبل ما أعمل الدور.
- أستاذ صلاح السقا صاحب فضل عليا وهو اللي كان سبب إني أخد عضوية النقابة، وكانوا رافضين لأني شغال موظف.
