أول رد من هاني فرحات على منع مطربي الأوبرا من المشاركة في مهرجان الموسيقى العربية
أعرب الموسيقار هاني فرحات عن سعادته بتكريمه في مهرجان ميما للموسيقى، وتحدث عن أزمة منع مطربي الأوبرا من الغناء في مهرجان الموسيقى العربية، مشيرًا إلى أن هذه الأخبار شائعات وليس لها أساس من الصحة.
وأكد الموسيقار هاني فرحات في تصريحات لـ القاهرة 24، أن منع مطربي الأوبرا في مهرجان الموسيقى العربية في دورته الـ 32 تعتبر شائعات وليس له أساس من الصحة، ولم يعلم مصدر هذه المعلومة، مشيرًا إلى أنه حتى الآن لم يختَر المطربين المشاركين في مهرجان الموسيقى العربية باعتباره مدير المهرجان.
وأوضح مدير مهرجان الموسيقى العربية الموسيقار هاني فرحات: أنا لسه مقررتش مين اللي هيغني في المهرجان، ومعرفش اللي بيتقال ده بيتقال ليه أو اتفهم إزاي، وأنا أصلا متفقتش لسه مع أي حد، والأوبرا وفنانين الأوبرا خط أحمر، وأنا أكتر واحد وقف في ظهر الأوبرا ووقفت في ظهر وزارة الثقافة وعملت حفلات ومتبرع بيها من جيبي عشان ينموا نشاطهم اللي موجود فـ إزاي هحارب الأوبرا وأنا ابنها.
وعن إمكانية وجود الفنان عمرو دياب ومحمد منير في مهرجان الموسيقى العربية في دورته الـ 32، أشار هاني فرحات إلى أن المهرجان عربي ومن الممكن أن يحضر أي مطرب عربي، مضيفا: المهرجان موسيقى عربية، والنجوم دول عرب، وأي فنان عربي ممكن نشوفه بيغني في المهرجان عادي، أنا مقررتش مين لسه هيغني في الدورة القادمة.
مهرجان ميما للموسيقى يكرم الموسيقار هاني فرحات
وعن تكريمه في مهرجان ميما للموسيقى، قال هاني فرحات: التكريم في بلدي مفيش أحلى منه، لما بحس أن الناس مقدرة شغلي ومقدرة تعبي واللي أنا بعمله، مفيش أحسن من كدا، ولكن التكريم ده مسؤولية أني أفضل أطور واشتغل أكتر.
