لطيفة: يوسف شاهين طلب مني مشهد قبلات بفيلم سكوت هنصور.. وإليسا عمرها ما كانت صاحبتي
حلت الفنانة التونسية لطيفة ضيفة على الإعلامية منى الشاذلي، في برنامجها معكم المذاع عبر شاشة قناة CBC، وتحدثت خلال اللقاء عن تفاصيل خلافها مع الفنانة إليسا في حفل تريونايت، وبداية مشوارها الفني.
ونرصد لكم أبرز تصريحات لطيفة في برنامج معكم منى الشاذلي
- مكنش منطقي أطلع والدة روبي في فيلم سكوت هنصور، بس اللي كان هيقولي عليه يوسف شاهين هعمله.. إلا حاجة واحدة طلبها ورفضتها وكان هيحصل مشكلة كبيرة.
- يوسف شاهين طلب مني مشهد جرئ في فيلم سكوت هنصور وأنا رفضت، وأصلا مكنش المشهد موجود في السيناريو، بل تم استحداثه قدام الكاميرا وإحنا بنصور، ووقفت التصوير وخرجت من اللوكيشن وكنت هنسحب من الفيلم.
- أحمد وفيق الوحيد اللي وقف معايا في أزمة المشهد بفيلم سكوت هنصور، وقالهم ما هي قالت من البداية مش عايزة تقدم قبلات، جايين تغصبوها قدام الكاميرا ليه؟!.
- وقت العرض الأول لفيلم سكوت هنصور في تونس، والدتي فرحت جدًا وهمست في ودني بعد الفيلم وقالت لي الحمد لله يا بنتي إنك معملتيش حاجة من اللي بيقولوا عليها في السينما.
- بحب بليغ حمدي من طفولتي وبغني لي، ورايحة عزومة عشا لقيته قدامي، وطلب منى أغني فبمنتهى البراءة بدل ما أغني لحن ليه روحت غنيت (أفرح يا قلبي)، وطلب مني استقر في مصر واكمل دراستي فيها علشان أحقق حلمي الغنائي وده اللي حصل.
- أقسم بالله إني غنيت الجزء اللي عملت عليه بروفة فقط في حفل تريونايت، ومزودتش أي حاجة.. ومشوفتش الريأكشن اللي عملته إليسا غير لما رجعت الفندق ولقيت الاتصالات من كل الناس وشوفت المقطع.
- إليسا عمرها ما كانت صاحبتي، ولكن مفيش عداوة بينا، بالعكس أنا بحبها وبحب أغانيها، لكن مش لاقيه تفسير للموقف ده، وبقولها متزعليش وربنا يوفقك.
