أول تعليق من عمرو محمود ياسين على اتهامات برنسة عبد الغني بإضاعة مسلسل لها
رد السيناريست عمرو محمود ياسين، على تصريحات الفنانة برنسة عبد الغني، والذي اتهمته بأنه ضيّع مسلسلا سلمته له يحكي عن مشوار حياتها الفنية.
وكتب عمرو محمود ياسين، منشورًا عبر حسابه الشخصي بموقع التواصل الاجتماعي فيسبوك، وقال: يا أستاذة برنسة تحياتي ليكي أولا، ثانيًا حضرتك كنتي قابلتيني وإحنا بنصور مسلسل ونحب تاني ليه، على ما أتذكر ولاقيتك من تلقاء نفسك جايبالي ملخص، وقولتي لي اقراه عشان عايزة إني أعمله مسلسل وقتها كنا لسه بنصور وما قدرتش أقراه وقتها.
وضاف عمرو محمود ياسين: قريته بعد كده لما اتصلتي بيا فكرتيني به بعد فترة طويلة، وقتها أنا قريته وللأسف مالقتش فكرة مناسبة له.. وحضرتك ماكلمتينيش تاني وأنا ماتصلتش برضه، وده تقصير مني بعتذر عنه، لكن مش عارف جبتي منين حكاية إني أنا ضيعته ؟؟ مش عارف جبتي الفكرة دي منين؟؟.
واختتم عمرو محمود ياسين: الملخص بتاعك في الحفظ والصون زي ما هو وتقدري تاخديه وقت ما تحبي وربنا يكرمك.
وعلى جانب آخر، أعلن عمرو محمود ياسين مؤخرا تعرضه لسرقة مكتبه منذ أيام قليلة، مشيرًا إلى أنه بالفعل تم القبض على السارق.
وكتب عمرو محمود ياسين عبر حسابه الرسمي بموقع التواصل الاجتماعي فيس بوك تفاصيل ما حدث، قائلا: منذ أيام قليلة كنت متوجها لمكتبي بدائرة العجوزة، وفوجئت بأنني غير قادر على فتح باب المكتب واكتشفت أن المكتب مغلق من الداخل.
وأضاف: فدخلت الشقة عبر الحديقة الخاصة بالمكتب من شقة الجيران، لأكتشف حينها اقتحام مكتبي وسرقة بعض محتوياته، ويمكن أكثر ما أحزنني هو سرقة بعض الجوائز والتكريمات، اللي حصلت عليهم عن أعمالي (نصيبي وقسمتك عدة مواسم ومسلسل ونحب تاني ليه، واللي مالوش كبير) من عدة جهات، واضح إنه كان فاكر إنهم دهب أو نحاس، ولكن في الواقع هما مالهمش قيمة مادية كبيرة، لكن لهم عندي قيمة معنوية أكيد.
