هنا الزاهد: دوري في مستر إكس لذيذ ومختلف.. ومسلسل سيب وأنا أسيب قريب لقلبي
تحدثت الفنانة هنا الزاهد عن مشاركتها في فيلم مستر إكس، الذي يجمعها مع زوجها الفنان أحمد فهمي، والذي شاركا من خلاله في موسم عيد الأضحى، بجانب حديثها عن مسلسلها الجديد المنتظر عرضه عبر منصة شاهد “سيب وأنا أسيب”.
وقالت هنا الزاهد في لقائها مع برنامج ET بالعربي، عن مشاركتها في فيلم مستر إكس: أول حاجة شدتني للدور الفيلم نفسه، ولما بختار أي عمل لازم يكون في مثلث كده الورق والمخرج والإنتاج، الإنتاج أنا عارفة إن الحاج أحمد السبكي بيصرف أوي على الأفلام بتاعته وبيطلعها بطريقة حلوة وده اللي شدني، وشدني الورق جدًا أحمد كاتبه حلو أوي، ودوري عجبني بصراحة مختلف ولذيذ ولايت.
أما عن مشاركتها في مسلسل سيب وأنا أسيب، فعلقت هنا الزاهد قائلة: سيب وأنا أسيب قريب لقلبي لأنه إنتاج الصباح وكمان معايا كاست كبير جدًا، منهم أحمد السعدني وكل اللي في المسلسل بحبهم جدًا وكلنا اشتغلنا على الأدوار، وعشنا مع بعض شهرين في لبنان كأننا كنا في رحلة وكلنا كنا بنذاكر مع بعض.
وتابعت كاشفة كواليس تعاونها مع الفنان أحمد السعدني خلال أحداث مسلسل سيب وأنا أسيب: أحمد السعدني خطير في المسلسل ولذيذ جدًا وأول مرة أشوفه رومانسي ولذيذ ومختلف كده، وبحب دوري أوي في المسلسل لأني عاملة مرحلتين خياطة وبعدين تطورت وبقيت فاشونيستا وهنشوف الصراعات اللي في حياتها، ويا رب يعجب الجمهور.
هنا الزاهد: فيلم تاج اتعمل أحسن مما كنت أتوقع
وأكدت الفنانة هنا الزاهد، أنها حرصت على تهنئة الفنان تامر حسني، بنجاح فيلمه تاج، قائلة: طبعًا باركت لتامر حسني على فيلم تاج ودخلت الفيلم وعجبني جدًا واتعمل أحسن من ما كنت أتوقع، ومبروك ليهم كلهم.
