محمد عبد الرحمن: كلمة الدور جديد عليك بتستفزني.. وخالد صالح مثلي الأعلى
تحدث الفنان محمد عبد الرحمن توتا، عن مشاركته في موسم أفلام عيد الأضحى، من خلال فيلم البعبع، وظهوره كضيف شرف في فيلم بيت الروبي، بجانب الكشف عن تفاصيل شخصيته في فيلمه الجديد البطة الصفرا، المقرر عرضه في أغسطس المقبل.
وقال محمد عبد الرحمن، خلال مداخلة هاتفية ببرنامج كلاكيت، على راديو نجوم إف إم: كان شرف كبير ليا مشاركتي في بيت الروبي، المنتج والمخرج حكولي أبعاد الشخصية وفرحت جدا إني هكون مع النجم كريم عبد العزيز دي حاجة تشرفني، وكمان هكون موجود مع أخويا وحبيبي كريم محمود عبد العزيز والأساتذة اللي في الفيلم كلهم.
وأضاف: صورت يومين بس في الفيلم ده وعدوا محستش بيهم، والموضوع كان بسيط الحمد لله، وكنا ميتين ضحك وإحنا بنصور مشهد القهوة ولبست زلطة وإحنا بنصور مشهد الخناقة، بس كنت مبسوط واتشرفت بالمشاركة في الفيلم.
واستكمل محمد عبد الرحمن، متحدثًا عن مشاركته في فيلم البعبع، بطولة الفنان أمير كرارة، وقال: المنتج كلمني وقالي في فيلم أنت وأمير وياسمين ففرحت؛ لأن دي مش أول مرة أشتغل سواء مع أمير أو ياسمين.
محمد عبد الرحمن: الراحل خالد صالح مثلي الأعلي
وأضاف: أنا مع فكرة البطولة الجماعية حتى وأنا بعمل بطولة، معنديش مشكلة في ده ومثلي الأعلى في الحتة دي هو الراحل خالد صالح، كان بيعمل بطولات جماعية عادي جدًا، وفي نفس الوقت يعمل بطولات بتاعته هو، أصل في الآخر إحنا بنعمل حاجة بنحبها، فـ هعملها في أي جزء منها، يعني لو جالي دور ضيف شرف حلو وهيستفزني إني أعمله هعمله، ولو جالي بطولة مطلقة أو جماعية هعملها.
تفاصيل شخصية محمد عبد الرحمن في البطة الصفرا
وعن فيلم البطة الصفرا، رد محمد عبد الرحمن: فيلم البطة الصفرا كانت تجربة جديدة عليا خالص والمنتج بعتلي الفيلم وقالي عندي فيلم بس ممكن يكون جديد عليك، أنا كلمة جديد عليك دي بتستفزني، وقريت الورق حلو جدا وفي تنوع في الفيلم، والموضوع كان تحدي، وأتمنى من ربنا إني أقدر أبين قوتي كممثل من خلال البطة الصفرا، لأنها شخصية فيها تمثيل بجد، وبقدم دور دكتور جامعي.
واختتم محمد عبد الرحمن حديثه، مشيدًا بالفنانة غادة عادل، التي يتعاون معها في فيلم البطة الصفرا، وأوضح: غادة عادل جميلة ويمكن اللي الجمهور ميعرفوش إنها من أطيب البني آدمين وغلبانة وطفلة جدا، وبتصدق أي حاجة، ودي مش أول مرة أشتغل معاها، دي المشاركة الرابعة بيني وبينها.
