أوس أوس: فيلم مستر إكس مصروف عليه.. خلى الناس تضحك من قلبها واللي زعلان فرح
تحدث الفنان محمد أسامة الشهير بـ أوس أوس، عن مشاركته في فيلم مستر إكس، الذي يعرض حاليًا في دور العرض السينمائي، بطولة الفنان أحمد فهمي والفنانة هنا الزاهد.
وقال أوس أوس خلال مداخلة هاتفية على راديو نجوم إف إم: الحمد لله الناس بتضحك من قبلها، في العرض الخاص لفيلم مستر إكس في الرياض، وكل اللي متضايق اتبسط وكل اللي زعلان فرح.
وتابع متحدثًا عن كواليس فيلم مستر إكس: مش بحب أنام وإحنا مسافرين، لما نرجع مصر ننام، فكنت بصحيهم دايما وإحنا مسافرين نصور برة، وأكتر حد كان فرحان بيا كان المنتج أحمد السبكي، عشان معاه كاست مش بينام.
وأضاف: فيلم مستر إكس قعدنا سنة شغالين على الورق وعلى كل مشهد، فـ لما جينا نصور بقينا مش بنعدل حاجة، مجرد شوية إفيهات ممكن تتضاف بس، فـ ده فادنا جدًا عشان الشغل أصلا جاهز على الورق، وبقالنا كتير مش بنعمل أعمال كوميدية كبيرة، ومستر إكس فيلم مصروف عليه فعلا.
فيلم مستر إكس
يعرض حاليًا فيلم مستر إكس، في دور العرض السينمائي، ويشارك في بطولته عدد من الفنانين، أبرزهم الفنان أحمد فهمي، الفنانة هنا الزاهد، محمد أنور، أوس أوس، بيومي فؤاد، رحاب الجمل، وآخرين، ومن تأليف وإخراج أحمد عبد الوهاب، وإنتاج أحمد السبكي، وينتمي العمل لنوعية الأعمال الكوميدية.
