رامي جمال: عمرو دياب نمبر وان بمقاييس السوق مش تامر حسني.. ومحمد منير أغانيه فلسفية
قال الفنان رامي جمال، إن الهضبة عمرو دياب هو النجم الأول بمقاييس السوق وطموحه في النجاح كبير.
وأضاف رامي جمال خلال تصريحات تلفزيونية: عمرو دياب نمبر وان بمقاييس السوق، وتامر حسني فنان شاطر بس مش رقم واحد، ولسه بدري على هذا اللقب، وممكن نقول عليه نمبر وان بعد 40 سنة مع استمرار النجاح.
وأشار رامي جمال إلى أنه من عشاق مدرسة محمد منير، مضيفا: محمد منير بيقدم اللي عايزه، وكلام أغانيه فلسفي ومزيكته مختلفة وبيعمل اللي هو عايزه وعمرو دياب محقق نجاح وغيرة فنية كبيرة.
وواصل رامي جمال: بشكل عام الطموح العربي قليل، وأغلب البشر طموحهم مرتبط بالفلوس، وده الدليل إن عمرو دياب طموحه مش فلوس، لكن طموحه يكون شخصية فنية لا تكرر.
رامي جمال يتحدث عن حياته الشخصية
وعلى جانب آخر، كشف رامي جمال أن أكثر عيب في شخصيته هو حبه الزائد للعمل، ما يؤثر على حياته الشخصية، معقبًا: أكثر عيب إن الشغل بتاعتنا بيسرق العمر، وكل شوية أقول هخلص ألبوم ونسافر، وندخل في اللي بعده ومراتي دايما تقولي مش مهم نأجل.
وأوضح جمال أن النجاح والطموح يستحمله الفرد لأنه حلمه إنما شريك الحياة يتحمل لأنه يحب، مؤكدًا أنه يكون مشغولا في أكثر أوقات حياته، لكن مساحة زوجته في حياته 100% حتى في الأوقات التي لا يكونون فيها مع بعضهما.
