الرحالة المصرية ڤيرا مصطفى تروي لـ القاهرة 24 لحظات لن تنساها من الترحال حول العالم.. وتفاصيل مرورها فوق بركان آيسلندا
ڤيرا محمود مصطفى، صانعة محتوى السفر، وهي فتاة مصرية تخوض تجارب سفر رائعة في مختلف دول العالم، بدأت السفر منذ عام 2005، وخاضت رحلات مختلفة في عدة دول، كان أبرزها ما يتعلق بزيارة القطب الشمالي، ومرورها فوق بركان آيسلندا.
وتدون ڤيرا مذكراتها وتوثق رحلات سفرها حول العالم عبر مواقع التواصل الاجتماعي وتحظى بإعجاب الكثيرين نظرًا لتجاربها الجذابة من مختلف الدول وزيارتها أماكن جذابة للغاية ومبهرة، وهو ما ترويه لنا صانعة محتوى السفر المصرية عبر القاهرة 24.
وقالت ڤيرا محمود مصطفى، بدأت سفر منذ عام 2005، وأبرز الأماكن التي زرتها هي القطب الشمالي، وحبيت دول الشمال جدًا، شمال النرويج وآيسلندا وشمال فنلندا وشمال السويد، مش علشان بس طبيعة مختلفة، لكن فيها حاجات بتورينا عظمة صنع الله وآياته زي البركان، والشمس 24 ساعة لا تغرب في الصيف، والعكس في الشتاء مبتطلعش، والشفق القطبي كمان.
وأضافت الفتاة المصرية صانعة محتوى السفر في تصريحاتها الخاصة للقاهرة 24، حبيت دول الشمال عشان كده، ولازم هتخليك تفكر فى ربنا طول الوقت، زمان كنت بحب سويسرا ومنبهرة بيها عشان طبيعة طبعًا رهيبة لكن بعدين لقيت الشمال مش بس طبيعة لكن الحاجات اللي شوفتها هناك تؤكد انبهاري بدول الشمال.
ڤيرا مصطفى فوق بركان آيسلندا
وفيما يتعلق ببركان إيسلندا الذي مرت الشابة المصرية ڤيرا من فوقه، قالت: سافرت الشهر اللي فات القطب الشمالي وشمال النروي، موضوع بركان آيسلندا وهي حزيرة بركانية في الأساس، والبركان انفجر يوم 10 يوليو، وأنا كنت مسافرة بلد تانية بس لما عرفت موضوع البركان غيرت الخطة وروحت أشوفه، كنت حابة أخوض التجربة، لأني ممكن معرفش أكررها تاني وكانت تجربة جميلة وتستحق أروحلها، وعديت من على البركان بطيارة هليكوبتر.
وكذلك تحدثت ڤيرا عن تجربة أخرى من تجاربها، قائلة: روحت جزيرة اسمها سڤالبارد، فيه أكتر من الفين دب قطبي، وممنوع تمشي هناك لوحدك غير فى أماكن معينة غير كده يبقى معاك مرشد أو بندقية، وأنا شفت واحد منها من بعيد، لأن دا خطر جدا وبياكل البني آدمين، وفي القطب الشمالي الحيوانات بيحترموها وسايبنها براحتها زيها زينا كده، والواحد بيلاقي حاجات غريبة أوى بتتمشى معاه عادي كده، ربنا جميل وخلق حاجات جميلة بجد سبحان الله.
وفي معرض حديثها عن عدد الدول التي زارتها ڤيرا وأبرزها، أوضحت أنها زارت نحو 30 دولة على الأقل، وأبرز الدول التي زارتها هي معظم دول في أوروبا وأمريكا وتايلاند والبرازيل وروسيا وإنجلترا.
وبالحديث حول تجربة السفر التي تخوضها الفناة المصرية التي تعرف بالرحالة بسبب كثرة سفرها، قالت ڤيرا: طبعا استفدت كتير من السفر حول دول العالم، واتعلمت حاجات كتير أهمها الالتزام، وطبعا السفر بيخليك تكتشف نفسك، وبتكتشف حاجات جديدة مكنتش تعرفها عن نفسك.
