انتصار: لازم ندرس طبيعة الرجل علشان نتكلم عنه.. والمنتج اكتفى بتقديم 10 أجزاء من راجل وست ستات
كشفت الفنانة انتصار، سبب عدم تقديم جزء جديد من مسلسل راجل وست ستات بطولة الفنان أشرف عبد الباقي.
وقالت الفنانة انتصار، خلال لقائها مع القاهرة 24، على هامش حفل افتتاح الدورة الـ 16 من مهرجان المسرح المصري: بعد ما عملنا 10 أجزاء من راجل وست ستات المنتج اكتفى بهذا القدر، وقال إنه مش هينتج أكتر من كدا وأشرف عبد الباقي انشغل بكذا حاجة تانية، وأنا شايفه إنه نجح جدا والجمهور متقبل الموضوع، والأطفال الصغيرة كبرت ومحتاجة تشوف أجزاء تانية، فالمنتج قالي أنا مستني أشرف عبد الباقي يقول يلا نعمل أجزاء تانية، وأشرف شايفه وحابه.
وأضافت انتصار: الناس كلها بتدافع عن الستات، ومحدش بيدافع عن الرجالة، لا يا جماعة مش معقول كله ستات بس، وبعدين لازم ندرس الطبيعة بتاعت الراجل عشان نعرف نتكلم عنه وندرس طبيعة الست عشان نتكلم عنها والست زرعتها مختلفة، ومينفعش أقول الست قاعدة في البيت مكفيه في تربية العيال والراجل المفروض يقعد في البيت؟ ليه الراجل يقعد في البيت، يحب عياله ويصرف عليهم وكل حاجة بس مش نفس طبيعة الست.
انتصار تتحدث عن مهرجان المسرح المصري
وتحدثت الفنانة انتصار عن سعادتها بإطلاق اسم الزعيم عادل إمام على الدورة الـ 16 من مهرجان المسرح المصري، حيث قالت: الدورة دي مميزة عشان بتحمل اسم الزعيم وبعدين هو أفنى حياته كلها في المسرح وكان شاطر أوي، ومسرحياته كانت بتقعد 6 سنين تتعرض، ومفيش نحم قدر يقعد السنين دي كلها ومسرحياته تفضل ناجحة، فهو أستاذ ونجم مسرح، ونجم العرب كمان.
