رسالة حب.. أب يدعم ابنته بعد ظهور نتيجة الثانوية: محققتيش أمنيتك لكننا فخورين بيكي لأنك مقصرتيش
دعم أب بالمنوفية ابنته الكبرى، بعد ظهور نتيجة الثانوية العامة، ليخفف عنها حزنها بعد عدم توفيقها في الحصول على مجموع يلبي طموحاتها، وكعادته قدم لها رسالة حب ومودة ورسالة اعتزاز بأنها لم تقصر طوال فترة تعليمها البالغة 14 عام.
وبدأ أيمن الدهشوري والد مريم طالبة الثانوية العامة بالمنوفية رسالته لابنته على السوشيال ميديا، وكتب فيها: الحمد لله، ربنا أكرمنا ومريم نجحت في الثانوية العامة، يمكن مجموعها مش هو اللي كانت بتتمناه، بس احنا والحمد لله راضيين بيه جدا جدا أنا وأمها، وزي ماقلت لها أنا بعتبر إنك جايبة 100%.
وتابع الأب رسالته: ممتن لدعواتكم وسؤالكم، مريم مش بنتي لوحدي دي بنتكم أنتم كمان ويارب يفرحكم ويبارك فيكم، مريم كانت قد المسئولية على مدار 14 سنة كانت فيهم مثال للبنت الملتزمة المجتهدة، عمري ما قلت لها مرة واحدة ذاكري، بل بالعكس أوقات كتير كنت بقومها من المذاكرة تنام، كانت بتخرج من البيت صباحا شايلة شنطتها الثقيلة مليانة كتب لأربع دروس يوميًا ترجع بعد العشاء متعبة مرهقة تراجع اللي أخدته.
وأردف: مش ذنبها التخبط والفشل بتاع نظام تعليمي مترهل، مش ذنبها أن ناس استحلت تهدر قيمة التعب والمجهود وتسرب وتبيع امتحانات، يمكن أنا أحب يتقال لي يا أبو مريم أكتر ما يتقال لي يا أبو الدكتورة، يمكن هي مش هتلحق كلية طب الأسنان اللي كانت بتتمناها، لكنها بعد 4 سنين بإذن الله هاتكون معيدة وبعدين دكتورة في أي كلية هاتختارها وهادعمها في اختيارها.
وتابع الدهشوري: أنا ووالدتها فخورين بها وبمجموعها وفرحانين بنتيجتها، يمكن هي مش مبسوطة، لكن رب الخير لا يأتي إلا بالخير، وهتتأكد من ده في أيامها الجاية، ألف شكر ليكم جميعا على سؤالكم ودعواتكم ومحبتكم، وربنا يديم بينا المحبة.
ونالت تلك الرسالة الصادقة من أب محب لابنته تفاعلا كبيرا على مواقع التواصل الاجتماعي فيسبوك، ودعم الكثيرين ابنته ومعها طلاب الثانوية العامة.
