مصطفى كامل: حصّلت من الساحل 10 ملايين جنيه في 45 يوما وخصصت 1.5 مليون للدعم المادي
كشف الفنان مصطفى كامل نقيب المهن الموسيقية العديد من المفاجآت، وذلك على هامش متابعته عملية انتخابات مجلس نقابة الموسيقيين، التي تتم حاليًا في نادي نقابة المهن التمثيلية.
تصريحات مصطفى كامل على هامش انتخابات الموسيقيين
وقال مصطفى كامل خلال لقائه مع القاهرة 24: مفيش حرامي قعدته، وجبت شباب جامعات كلهم فرحانين بالشقا وبدأنا ندربهم مع الناس الشرفاء، ومسكنا أماكن زي المعادي اللي كانت بتحقق من 18 لـ 19 ألف جنيه في الشهر، النهارده الشباب دول حصّلوا منهم 400 ألف جنيه في الشهر، شايفين الفرق قد إيه؟
وأضاف مصطفى كامل: كانوا بيتباهوا إنهم بيجيبوا من الساحل الشمالي 4 ملايين جنيه في السيزون كله، أنا في 45 يوم بس بس جايب 10 ملايين جنيه من الساحل، بواسطة الشباب دول بعد ما اتمرنوا في القاهرة وديت جزء منهم للساحل يحصل، شباب محقق معايا حالة أدبية ومعنوية تشرف وموارد محصلتش في تاريخ النقابة.
وأردف مصطفى كامل: هاتوا مؤسسة في مصر رفعت معاش 3 مرات زينا، ده مش صعب ولا حاجة، بس فيه مثل بيقول اطبخي يا جارية كلف يا سيدي، كنا بنقول اطبخي يا جارية والسيد سارق الحكاية كلها، النهارده النقابة فيها فلوس إيه المانع نمتع العضو بيها على كل المستويات.
مصطفى كمل: رفعنا معاش الموسيقيين 3 مرات
وأردف مصطفى: رفعنا المعاش 3 مرات كل مرة كانوا بنسبة 10%، ومع بداية غلاء الأسعار قلت عندي فائض وطلعت مليون جنيه للأسر الأكثر احتياجًا ووصيت نقيب كل فرع اختيار الأسر اليتيمة وموسيقيين لا يعملون وناس بجد محتاجة تتراوح أعدادهم بين 150 و170 شخصا، وراح الدعم المالي للمستحقين، وفي رمضان عملت دعم بمبلغ نص مليون جنيه لشنطة رمضان، وراحت لمكان كل واحد محتاج، اتقال إن الشنط دي كانت بتتجاب وتروح لبيوت ناس معينة بالـ 400 شنطة.
واستكمل مصطفى كامل حديثه: لما تبقى عدد من البونات كانوا 550 بون، دور على بُسطاء أكتر وادينالهم الشنط، وقبل العيد بأسبوع خطر على بالي نوزع عيديات لزملائنا في النقابة في ظرف شيك مكتوب عليه شكرًا وكان فيه 200 جنيه لكل شخص، قد إيه كنت بتبسط لما كنت بلاقي موسيقي داخل والفرحة على وشه، تقدير بسيط من نقابته ده مش مَنّ مني.
