صاحبة صورة عربيتي اللي بعت جهازي وجبتها: هزار ولقيت مصر كلها بتتكلم عن الموضوع
تداول نشطاء على مواقع التواصل الاجتماعي، صورة لـ شابة تدعى إسراء حسنين، وهي تقف أمام سيارة، مرفقة بتعليق عربيتي اللي بعت جهازي وجبتها، وكان هناك تباين بين آراء مستخدمي مواقع التواصل على صورة إسراء.
أول تعليق لـ صاحبة صورة عربيتي اللي بعت جهازي وجبتها
وتحدثت إسراء حسنين لـ القاهرة 24، عن حقيقة الصورة المنتشرة لها بمواقع التواصل الاجتماعي قائلة: الموضوع كله كان من باب الهزار مع صحابي على حسابي بفيس بوك، وأنا كنت رايحة من يومين مع أختي التوكيل عشان تجيب عربيتها من هناك.
وأضافت: ويشاء السميع العليم كنت لابسه أوت فيت نفس لون العربية، فخليت أختي تصورني، وجيت بعدها بيوم كنت منزلة بوست على إني مشترتش عزال عشان القايمة اللي اتلغت وكدا، وبعدها كتبت تعليق: أنا أصلا هبيع جهازي واجيب عربية، فجيت تاني يوم نزلت صورتي من باب الهزار مع صحابي.
وعن ردة فعلها بعد انتشار الصورة على فيس بوك فقالت: كان كل دا هزار ومكنتش أتوقع الناس تفتكر بجد، وبالفعل كان أي حد بيفكر إن الموضوع بجد كنت بقوله لا دا هزار، ونمت بقا صحيت لقيت مصر كلها بتتكلم عن الموضوع، وكان فيه اللي بيهاجم واللي بيعمل ترند عليا، والفيمنست اللي اعتبروني كوين ليهم وأنا أصلا بريئة من أفكارهم، ولقيت الموضوع بقا ترند في مصر، وكله كان هزار.
وبالنسبة لرأي أهلها وأصدقائها على الصورة فقالت إسراء: أولا الحمدلله ماما لسة معرفتش لو عرفت هيكون يومي مش فايت، أما صحابي كتيرررر جدا دخلو يقولولي والله فكرة جميلة وناس كتير جدا من صحابي فعلا فكرت إني عملت كدا بجد وعجبتهم الفكرة كلها.
