المتهمة فى قضية طبيب الساحل تكشف تفاصيل الواقعة | تحقيقات
حصل القاهرة 24 على نص التحقيقات في قضية قتل طبيب الساحل أسامة صبور، وحوت الأوراق على اعترافات المحامية إيمان إحدى المتهمات في الجريمة.
نص اعترافات إيمان
واعترفت إيمان، قائلة: يوم 5 يونيو 2023 بعت لأحمد شحته رسالة واتس وقولتله طمني عليك، فقالي متخافيش والدنيا ماشية تمام، ومتتصليش عليا عشان قلقان من المكالمات، وهيستناني بكرة في عيادة الخلفاوي عشان يكلمني براحته فيس تو فيس، وياخد مني التلفون اللي استدرجت بيه اسامه، وروحتله فعلًا تاني يوم.
وأضافت: أول ما دخلت العيادة لقيته متوتر وقلقان، وقال لأحمد فرج مش عاوز أشوف وشك في العيادة تاني، واتكن فترة في عيادة البساتين، وقال إن أسامة مات وهو بيقحنه بالبنج، وانهم مطلعوش بحاجة من الموضوع ده غير بمحفظة فيها 250 جنيه، وقالي كمان انه حط جثة اسامة في حفرة كانوا مرتبينها من قبل كده، قولتله انتوا كمان مخططين تقتلوه؟، قالي أمال انتي فاكرة إننا كنا هنسيبه عشان يفضحنا.
وأضافت المتهمة بقتل طبيب الساحل: وبعدها اخدني لجوه ولقيت مستطيل مترين في مترين، قولتله انا مش قادرة أقف في المكان ده، وهيغمى عليا وعاوزه أخرج وقالي متخافيش محدش هيعرف حاجة لإني كسرت كل التيلفونات، ورميتهم في النيل، وساعتها انا دماغي اتشلت عن التفكير وسبت العيادة ومشيت.
وتابعت: ومتواصلتش مع أحمد شحته لمدة 5 أيام، ومشيت وفضلت قافلة تيلفوني، ولما فتحت تيلفوني لقيته بيكلمني على الواتس، وبيقولي ليه انتي مش عاوزة تكلميني، انا بعمل ده كله عشان اتجوزك، وقالي خلصي تراخيص عيادة الخلفاوي ومش محتاج منك حاجة تاني، وروحت العيادة ودخلت مكتب احمد شحته ملقيتوش، ولا لقيت الفلوس بتاعت التراخيص، فكلمته في التليفون قالي إن الورق نسيه في الشنطة وانه لسه في المعهد، وأنا كنت متوترة ومش عارفة أقعد في العيادة لإني حسيت إن الريحة ابتدت تطلع، ومش عارفة ده فعلا ولا أنا عشان عارفة إن الراجل جوه فبيتهيألي.
واختتمت اعترافاتها: وبعد ما طلعت من العيادة جالي تيلفون، وعرفت انه من رئيس مباحث شبين القناطر وطلب مني أروحله هناك، وفعلا روحت هناك وفهمت انه بسبب الجريمة دي وروحت على قسم شبرا الخيمة، وبعدها على قسم الساحل وبعدها جيت على النيابة وده كل اللي حصل.
