ماندو العدل عن محمد رمضان: فنان مميز وبيعبر عن الشباب.. ليه بتشككوا في موهبته؟
رد المخرج ماندو العدل على منتقدي الفنان محمد رمضان بسبب أعماله في بداياته الفنية، مؤكدًا أنه ممثل محترف ويعبر عن الشباب والمصريين، بجانب الحديث عن فيلم ع الزيرو.
وقال ماندو العدل خلال لقائه على راديو 9090: الجمهور بيحصر محمد رمضان في نوع معين من الأفلام ودي مش حاجة حلوة ولكن أنا كمخرج بشوف محمد رمضان موهوب وبنطلع نتيجة كويسة في الأعمال سوا، وبالفعل أعماله أثبتت موهبته ونقدر نشوف قد إيه مسلسلاته وأفلامه نجحت.
وأضاف ماندو العدل: بستغرب لما حد لسه بيسأل هل محمد رمضان موهوب ولا لا، ليه الناس بتشكك في موهبته؟ هو طبعا موهوب، وأنا حاولت أظهر للناس قد إيه هو شاطر في فيلم ع الزيرو وشبه المصريين ووشه منحوت وبيعبر عن الشباب، والحمد لله الفيلم نجح والجمهور استقبله بشكل كويس.
ماندو العدل يكشف كواليس فيلم ع الزيرو
كما تطرق ماندو العدل للحديث عن فيلم ع الزيرو، قائلا: ورق فيلم ع الزيرو كان مكتوب لـ محمد رمضان مخصوص واتفقنا عليه من 5 سنين ولكن اتأجل وكلنا انشغلنا لحد ما اتكلما عن الفيلم تاني السنة اللي فاتت ومحمد كان حابب الفيلم والفكرة من الأول وبدأنا تصويره.
وواصل ماندو العدل: لما بنعمل أي فيلم مش بنكون واثقين من نجاحه 100% ولكني حبيت فيلم ع الزيرو لإنه بيعبر عن مشاكل محدودي الدخل وخصوصا لما بيصاب حد منهم بمرض السرطان لأنهم مش بيكونوا عندهم مصدر دخل كافي ولا حول لهم ولا قوة ومفيش صوت بيعبر عنهم ورهاني على الفيلم بسبب أن محمد رمضان عنده شعبية ومؤثر وهيقدر يوصل الرسالة للجمهور.
ويذكر أن فيلم ع الزيرو، يضم عددا كبيرا من الفنانين بجانب محمد رمضان، من بينهم نيللي كريم والطفل منذر مهران وإسلام إبراهيم وجومانا مراد.
