محمد مرزبان: رفضت دور علشان أحافظ على سمعة بناتي.. ومضيت عقد فيلم ناصر 56 دون اهتمام بالأجر
تحدث الفنان محمد مرزبان، عن تعاونه مع الفنان الراحل أحمد زكي، خلال أحداث فيلم ناصر 56، وتعاونه مع المخرج محمد فاضل.
وقال محمد مرزبان، في لقائه بـ برنامج الستات مايعرفوش يكدبوا، المذاع عبر شاشة قناة CBC: كانت علاقتي طيبة جدًا مع المخرج الكبير محمد فاضل، واتقابلنا في مكان وطلب رقم تليفوني، وكلمني وطلبني في فيلم ناصر 56، وأنا كنت في حالة ذهول، وروحت ماسبيرو ومضيت العقد من غير ما أهتم هاخد كام، وعرفت إني هعمل دور حسين الشافعي.
وأضاف: بعد كدة قربت من الأستاذ أحمد زكي وكان في مشهد المفروض الزعيم جمال عبد الناصر بياخد رأي حسين الشافعي في تأميم قناة السويس، والكاميرا لما جت عليا كان المفروض هو يقوم وحد تاني يقعد مكانه وأنا أقول جملتي، فالأستاذ رجع جري وقال أنا هقعد علشان صوته اتغير لما أنا خرجت.
محمد مرزبان: رفضت تقديم أحد الأدوار علشان أحافظ على سمعة بناتي
كما كشف محمد مرزبان، عن رفضه لأحد الأدوار بسبب قيمه الأخلاقية، قائلًا: رفضت زمان دور كان مهم جدًا ولكن مكنش ينفع أعمله لأنه مكنش من مبدأي إني أعمل كده، لأني أب لـ بنتين وكان لازم أحافظ على سمعتهم، وقولت مش هعمله حفاظًا على سمعة بناتي.. وقولت ليه أخلي يوم في الأيام يتقال لبناتي مش انتي بنت فلان؟ لأن في ناس بتصدق الأدوار.
وأشار الفنان محمد مرزبان، إلى أنه يعمل على تشجيع سياحة مصر دائمًا، قائلًا: دايمًا بقول لزملائي بدل ما تسافر بره شجع سياحة بلدك وعرفوا أن العالم مصر أمان، خلونا نكتشف بلدنا الأول.
