الفنان عادل شعبان: مفيش حاجة اسمها نمبر وان.. ولازم الجمهور يقبل الفنان إنسانيا
عبّر الفنان عادل شعبان عن رأيه في لقب نمبر وان الذي يُطلق على الفنان محمد رمضان، مشيرًا إلى أنه لا يقبل ذلك اللقب لأي فنان.
وقال عادل شعبان خلال حواره مع القاهرة 24: أنا بالنسبالي مفيش حاجة اسمها نمبر وان، مع كامل الاحترام لكل الزملاء على الساحة، الجيل اللي قبل مننا ليهم بصمات مختلفة وليهم مذاق مختلف والمعايير كانت مختلفة والكتّاب كانوا مختلفين ويمكن لكل عصر أوان.
وأردف عادل: محمد رمضان فنان ممتاز وممثل هايل جدًا وأنا أعرفه من قبل الشهرة هو حد متواضع ومؤدب جدًا على المستوى الإنساني وعلى المستوى الفني هو شاطر وفنان مبدع، واشتغلت معاه في زلزال يمكن مشهد واحد جمعني بيه كنت أنا وهو لوحدنا، هو من الفنانين اللي الواحد يستمتع في العمل معاه ومع المخرج محمد سامي المتمكن والشاطر وبيعمل أعمال مبدعة.
واستكمل قائلًا: محمد رمضان ربنا يوفقه، بس مسألة نمبر وان دي مش عندي، أنا معنديش حاجة اسمها نمبر وان؛ لأن الفن فيه تباين ويمكن يتشاف بأكثر من زاوية وكل واحد بيكون الانطباع اللي هو عايزه.
وأضاف: هقدم نصيحة للفنان محمد رمضان أنت عندك جمهور كبير متأثر بيك وبيعتبرك قدوة فبالتالي ما يتعلق بالتصرفات الشخصية يحتاج مراجعة علشان ميبقاش له أثر سلبي على المجتمع الفنان قيمته إن المجتمع يحتويه ويدعمه ويحبه والممثل مهما عمل لو الجمهور مصقفلوش بينزل لسابع أرض فعلشان الجمهور يصقفلك لازم تكون أنت فنيًا وإنسانيًا على المستوى اللي الجمهور يقبله.
الفنان عادل شعبان: مش راضي عن مشواري الفني ومستني فرصة كويسة
أما عن مشواره الفني، فأشار عادل شعبان إلى أنه غير راضِ عما قدمه على مدار السنوات الماضية، موضحًا أنه مازال في جعبته الكثير لم يتمكن من إخراجه للنور بعد، منتظرًا الفرصة الجيدة التي تتيح له إبراز إمكانياته، مطالبًا بفرصة تتيح له إجادة الأداء وإظهار إمكانياته.
