شريف منير عن حلق ابنته أسما شعرها: مغلطتش.. وخدتي التريند برافو عليكي | بث مباشر
انتشرت عبر مواقع التواصل الاجتماعي، حالة كبيرة من الجدل بعدما حلقت أسما شريف منير، شعرها أمام الكاميرا، وعلق الفنان شريف منير على تصرف ابنته خبيرة التجميل أسما شريف منير، وعلى حلقها شعرها زيرو، مشيرا إلى أنه معجب جدا بتصرفها وبإطلالتها الجديدة.
وقال شريف منير، عبر مقطع فيديو نشره عبر حسابه الشخصي على موقع التواصل الاجتماعي انستجرام: إيه الدوشة اللي إنتو عاملينها دي وإيه الضجة اللي إنتو عاملينها دي، كل ده عشان بنتي قصت شعرها قدام الكاميرا إيه الغلط اللي هي عملته، تصرف عادي جدًا مفيهوش أي حاجة.
وأضاف شريف منير: أوعوا تفتكروا إني هاجي على بنتي عشان خاطر أكسب رضاكم.. دي بنتي اللي مليش غيرها وبحبها.. بالمناسبة اللوك اللي عملته عاجبني، وأنا مبسوط منها أوي، بس قبل ما الأخوة الملائكة الصالحين اللي عمالين يقلوا أدبهم، وبيقولوا تاخد التريند، وبيقولوا أبوها معرفش يربيها، لا أنا بنتي متربية كويس جدًا بس هي بتتصرف باللي هي حاسة بيه، المهم انها متكونش بتأذي حد.
وأكمل: قبل ما تتكلموا بصوا على نفسكو واتفرجوا على عيلتكوا، وعلى أخواتكم وعلى الناس اللي حواليكم قبل ما تنتقدوا وتغلطوا وتقولوا متربتش بـ 3 تعريفة أو بربع جنيه تربية، لا أنا بنتي متربية كويس جدًا.
واستكمل: اللي حصل من بنتي مش غلط ومش عيب، هي مغلطتش في حد فيكو ومغلطتش في نفسها، وبعدين بنتي عندها 36 سنة وأم، وعندها بنوتة ومسئولة عن نفسها.. وأنا أب مسئول إني أحميها وهي حرة في تصرفاتها.
واختتم شريف منير تصريحاته قائلا: أسما.. انتي شكلك زي القمر وشكلك حلو جدًا وخدتي التريند برافو عليكي، متسمعيش كلام حد ومتهتميش بكلام حد وأنا مش مهتم بالكلام اللي بيتقال عليا ولا عليكي، المهم إننا مش بنضر حد.
