شاب يتغيب عن أسرته منذ شهر.. ووالدته: جاب ليا العلاج واختفى بعدها
تغيب شاب يدعى رشدي طه عبد الباسط الشرقاوي، عامل محارة مقيم بدائرة قسم ثان شبرا الخيمة محافظة القليوبية، منذ قرابة شهر عن منزله، وحررت أسرته محضرا بالواقعة، وتكثف أجهزة الأمن جهودها لكشف غموض الواقعة.
تغيب شاب في ظروف غامضة
كانت البداية عندما تلقت الأجهزة الأمنية بالقليوبية بلاغا من أهلية شاب يدعى رشدي طه عبد الباسط الشرقاوي، يعمل عامل محارة بمنطقة شبرا الخيمة، بتغيبه عن منزله منذ أول شهر أغسطس الماضي، وتكثف أجهزة الأمن من جهودها لكشف غموض الواقعة وملابساتها.
وتواصل القاهرة 24 مع والدة الشاب المتغيب رشدي وقالت: ابني شغال عامل باليومية وقبل ما يختفي حضرلي الأكل وأكلني وخدت العلاج بتاعي وقالي يا ماما أنا هنزل أشوف رزقي وهقعد في الشارع شوية أشوف لو حد محتاج أطلع ليه شوية رملة أو أكسر حيطة وهاجي على طول وساب الموبايل بتاعه في البيت.
وأضافت والدة الشاب المتغيب: رشدي هو اللي بيصرف على البيت كله وهو اللي جهز أخواته البنات وبيجيب ليا العلاج لأني مريضة، وعمره ما اتأخر برة البيت ولو رايح أي مكان بيقولي عليه، اليوم اللي ابني اختفي فيه حضرلي الغدا وقالي هنزل أشوف رزقي وبعدها مشفتوش تاني.
واختتمت: نفسي أشوف ابني تاني أنا قلبي وجعني عليه وحاسة إن ابني فيه حاجة وكل يوم بيزورني في أحلامي وكأنه في حاجة، إدعولي أشوف ابني تاني.
