بشرى عن انتقاد طارق الشناوي لنجمات حريم كريم: عيب راجل يتكلم على سن واحدة ست
علقت الفنانة بشرى على تصريحات الناقد الفني طارق الشناوي ووصفه نجمات فيلم أولاد حريم كريم بأنهن فقدن وهجهن واستعان بهن مصطفى قمر في الفيلم ولذلك لم ينجح العمل.
وقالت بشرى خلال ندوة تكريمها بالقاهرة 24: مفيش راجل في مجتمعنا وأخلاقنا وإحنا أخلاق مصريين وعرب يتكلم على سن واحدة ست وما ينفعش ولا يجوز ومش أخلاقنا، وداليا البحيري عاملة مسرحية وواخدة جوائز وبسمة بتخلص من فيلم وتدخل على مسلسل وليها فيلم في السينما وعلا غانم معتزلة بمزاجها وسافرت أمريكا وعملت بيزنس ومشيت نجمة ورجعت نجمة وعندها تلات مسلسلات ومش عارفة تختار بينهم والناس بتحبها وممثلة تقيلة ومؤثرة، وأنا من مواليد التمانينات وزمايلي بيقول لي إننا حاسبينك على أنك من جيل الشباب.
وأضافت بشرى: فنانات الفيلم عندهم جرأة لأنهم بيعملوا أمهات لـ شباب أصغر من ولادهم الحقيقين، مردفة: هل الست بعد ما تتم التلاتين وأوائل الأربعين نقعدها في بيتها ولا نضربها بالنار زي الكلاب البوليسي المريضة، أومال مين هيعمل أدوار الأم وأدوار المدرسة وأساتذة الجامعة.
وواصلت بشرى: عمري ما عاتبت طارق الشناوي وإحنا في لجان كتير جوه وبره مصر وبقدره وبنتناقش في حاجات كتير، والفيلم ده مش ذوقه، لأن فيلم أولاد حريم كريم فيلم اجتماعي كوميدي لايت وطارق بيهتم أكتر بأفلام المهرجانات التقيلة والمهمة والأفلام الأجنبية ومش متوقعة أنه اتفرج على الفيلم، وهو له احترامه وناقد كبير وزميل حقه ينقد ولكن كان المفروض يراعي باقي فريق العمل في النقد شوية.
أزمة فيلم أولاد حريم كريم
ويُشار إلى أن الناقد طارق الشناوي انتقد فيلم أولاد حريم كريم وكذلك الفنان مصطفى قمر بطل العمل، ووصفه بالمطرب الفاشل كما انتقد نجمات العمل، وهو الأمر الذي أزعج مصطفى قمر ورد عليه في منشور عبر حسابه بموقع إنستجرام إلا أن البعض رأى أن رده غير لائق، وعليه قرر الشناوي اتخاذ إجراءات قانونية ضده لرده عليه بهذه الطريقة.
